FLAM leh Mizorama political party-te'n inthlana sum sen ngai tam ṭha lo an ti

Former Legislators of Mizoram (FLAM) huaihawtin nimin khan Assembly House Annex conference hall-ah Mizorama political party tin aiawhte intawhkhawm buatsaih a ni a; resolution siamin, Election Commission of India (ECI)-in a phal bâk inthlan senso ngai tam lutuk chu ṭha lo an tih thu an tarlang.

Ṭhutkhawmah hian MNF, Congress, PC, BJP leh ZPM party aiawhte an tel a, FLAM president Liansuama'n a kaihruai. Kum 2023-a MLA General Election awm tur chungchang sawihoin, resolution an siam a ni.

An resolution-ah chuan, "ECI-in a phal bâk inthlan senso ngai tam ta lutuk hi ṭha lo kan ti a, thuneihna chan tuma sum thianghlim lo pawh hmang hreh lote'n ram rorelna hmun sang an luah mai a hlauhawm kan ti. Kan ram inthlanna hrang hrang a lo thianghlim a, sorkar ṭha, rintlak kan neih nana sûlsutu MPF hi tun aia chak leh ṭha zawka a kal theih nan MPF-a la tel ve lo kohhran leh NGO-te an tel vekna tura FLAM-in hma a lak hi ṭha kan tiin kan thláwp tlat a, a hlawhtlin ngei theih nan MPF hotute'n tun aia nasa hian hma la se tih hi kan duh dan a ni," an ti.