KHAWTHLIR

Inbe dawn
Mizoram leh Assam-in ramria buaina an neih chungchangah vawiin chawhma dar 11 hian Guwahati-ah state pahnih sorkar aiawhte an inbe dawn. Inbiaknaah hian Mizoram team chu Home minister Lalchamliana'n a ho dawn a, IPR minister Lalruatkima, Home secretary H Lalengmawia leh official dangte an tel ang.

Hriselna Kûtpui
National Health Mission-in Ayushman Bharat - Health & Wellness Centre (AB-HWC) tinah Hriselna Kûtpui (Health Mela) buatsaih tura a ruahman angin, nimin khan Lawngtlai Vengpui HWC huam chhunga mite tan Don Bosco School, Lawngtlaiah Health Mela buatsaih a ni a, mi 170-in an hriselna dinhmun an entir.

Minister-in pe
Social Welfare & Tribal Affairs minister Dr K Beichhua chuan nimin khan a pisaah National Action Plan for Senior Citizens hnuaiah Mizoram Upa Pawl-te hnenah oxygen concentrator a pe. MUP awm lohna khuaah chuan khawtlang huap páwl dang hnenah pek a ni.

Green-Ag zirhona
Green-Ag project hnuaiah nimin khan Agriculture directorate committee room-ah 'Curriculum Development on Sustainable Agriculture' tih hmangin workshop buatsaih a ni. Agriculture department leh a kaihhnawih department aṭangin mawhphurtute an tel a, thupui chi hrang hrang zirhoa sawiho a ni.

ZORO-in CM hmu
Zo Reunification Organisation (ZORO) General Headquarter hruaitute chuan nimin khan chief minister Zoramthanga chu a pisaah an kâwm a, March 2023 thla tìr lama Zo fate Inkhawmpui Lian (Zofa Convention) neih dan tur an sawipui. Chief Minister chuan, theihtawp chhuaha hmalakpui a tum thu leh a lo en zui tur thu a sawi a ni.

Jubilee lawm
Mizoram Florists' Association chuan nimin khan Synod Conference Centre-ah an din champha vawi 25-na, silver jubilee an lawm a, Agriculture minister C Lalrinsanga'n a hmanpui. Florists' Association hi November 1997-ah din a ni a, branch 26 a awm mek a, an thupui chu 'Mizoram pangpara tihvul' tih a ni.