Peoples' Conference party chuan, chief minister Zoramthanga chu Mizo Hnam Rûna a awm laiin chief minister lirthei pakhat chu Zuangtuia huan pakhatah a awm daih tih an tarlang a; chu huanah chuan chief minister car a awm fo avangin chhui chiang a, dan anga hma la turin sorkar an ngen.
November 15, Thawhlehnia Aizawl East-I biala an campaign-naah, Zuangtui huam chhunga picnic spot pakhatah CM Zoramthanga a awm miah lo chungin CM car pakhat MZ-01 K-7707 chu an hmuh thu leh, chumi hun lai chuan CM Zoramthanga chu Mizo Hnam Rûnah a awm a, thute pawh a sawi thu PC chuan an tarlang.
PC party chuan, "Hnam Rûna a awm daih lai hian Zuangtuia CM Pu Zoramthanga fapa Ramthansiama ta nia sawi picnic spot-ah CM car pakhat nia lang, CM tih intár chu kan hmu. He lai hmunah hian CM tih intár car hi a awm ngun hle niin thu kan dawng. Hetianga intihhlimna hmuna CM leh a staff-te awm miah si loa CM car a awm fo hi chhui fiah tur leh dan hmanga action la turin sorkar kan ngen a ni," an ti.
PC party chuan, CM car an hmuh chu registration number MZ-01 K-7707 a ni a, Aizawl District Transport Officer pisaa register a ni tih sawiin, "RTO vehicle information aṭanga enin, car hi kum riat zet chhiah pe miah loa kawl niin a lang a, hei hi chhui chiang a, a ṭul anga action la turin a mawhphurtute kan ngen a ni," an ti bawk.