Remna Kawtchhuah Hriatrengna Lungphun

India sorkar leh MNF-in inremna an ziah hnua MNF sipai Arakan-a awmte Mizorama an luhna hmasa ber, Peace Camp sakna hmun Parva khuaah MNF diamond jubilee pualin 'Remna Kawtchhuah Hriatrengna Lungphun' siam a ni a, MNF senior vice president Tawnluia, deputy chief minister-in a hawng.

Lungphun hawn zawhah Parva-III community hall-ah vantlang inkhawm buatsaih a ni a; Tawnluia chuan, kum 1961-a MNF din a nihin thil tum a nei tih sawiin, "Zo hnahthlak zawng zawng zalenna sang tak neia rorelna pakhat hnuaia awm tura hmalak chu a tum lian ber pakhat a ni," a ti.

Tawnluia chuan, mi ṭhenkhatin MNF-te chu independent sual peih tawh lo leh India-a inpe anga an sawi ṭhin thu sawiin, "Hei hi dâwt a ni. In surrender reng rengin a lehlam ve ve pawm theih remna thuthlung an ziak ngai lo. Inremna ziah a nih avangin ralthuam kan hman tawh loh tur silaite kan tung mai zawk a ni. Kan hnam sipaite kha an in surrender lo a, Zoram mipuite'n min au lo se la chuan vawiin thleng hian ramhnuaiah kan la awm ang," tiin a sawi.

MNF Senior Vice President sawi danin, kum 1964-ah MNF volunteer 22-in Chittagong, Bangladesh bulah training an nei a, training zawhah silai leh a mu eng emaw zat hawnin Mizoram an pan a, an ralthuamte chu Parva dáiah an thukru a, khawtlang mi tlemtêin an hria a ni.

MNF leh India inremna angin Mizoram chu state puitlinga hlankai a ni a, special provision neia chanvo pek a nih thu sawiin Tawnluia chuan, "Hnam sipaite tan ramhnuaiah awm a rem tawh lo," a ti a; an silaite nen Arakan aṭangin Mizoramah an haw thu a sawi.

Tawnluia chuan SEDP chungchang sawiin, "SEDP first instalment kan sem tawh a, second instalment kan pe leh nghal mai dawn a, nakkumah kumina pek zat chiah hi a thar hlak kan tuam leh dawn. Nakkum inthlanpuiah sorkarna kan lak leh hunah mi dang pawh kan pe zel ang," a ti.

MNF thuchhuah tarlan danin, Arakan aṭanga MNF mi leh sate Mizorama an hawnaah Parva khua hi India sorkarin a lo hmuahna hmun a ni. MNF-te chuan Arakan aṭangin Réngtlâng lâwn liamin Parva lui an kân a, MNF sipai 392 (nunau chhiar tel loin) an haw a, July 24, 1986 khan Parva khuaah hian an châwl a ni. Parva aṭangin ke vêkin Bungtlang South thleng an kal leh a, Bungtlang South aṭangin MST bus-in Lunglei leh Aizawl lam an pan a ni.