ZPM a sorkar chuan tar pension Rs 1,000-in kan tipung zawn - Duhoma

ZPM leader Lalduhoma chuan, ZPM party-in sorkarna an chan chuan health care scheme chu damdawia inenkawlna senso sum an pek nghal ngai lo (cashless)-in an kalpui dawn thu leh tar pension chu Rs 1,000-a an tihpun dawn thu a puang.

Lalduhoma hian November 15, Thawhlehni khan ZPM Tuivawl Block I&II-in Darlawn Town Hall-a political training an buatsaihah thu sawiin, sorkarin health care-ah sum tam tak a bá a, damlo bill táng tam tak a awm mek thu a sawi a, "Pathian zara sorkarna kan siam a nih chuan health care hi cashless-in kan kalpui ang a, tuna golden card ang hi kan nei ang a, pawisa pek ngai loin kan ti dawn. Tar pension kan tipung dawn a, tuna an dawn bakah Rs 1,000-in kan belh dawn a ni," a ti.

ZPM Leader chuan, "Kan ramah hian sorkar tichhetu chu ruling party an ni a, Pathian zarah kan sorkar chuan kan ram tichhetuah kan ṭan ve a thiang lo a, kan danglam ngam tur a ni. Zorama politics khelte hian an khelh tum ber chu khelh fuh a ni a, keini chuan khelh dik kan tum tur a ni," a ti a; taimak leh thawhrim a ṭul thu a sawi.

Sorkar hna lak reng rengah MPSC-in dik taka hna an lak theih nan hma an la dawn a, an thuam chak dawn tih sawiin Duhoma chuan, "MSSSB (Mizoram Subordinate Services Selection Board) hi party mi leh sa induhsakna, uchuak taka hna lakna a ni a, ṭhalaite min tibeidawngtu a ni. Pathian zara rorelna kan chang a nih chuan kan ṭhiat nghal dawn," a ti.

Lalduhoma chuan, economic nationalism an kalpui dawn nia sawiin, "Kan ram thar chhuah kan ngaihlu dawn a, kan rama awm sa reng ram danga mi lak luhte kan ti ve dawn lo," a ti a; Mizorama siam chhuah chawi sángin, ram dang aṭanga lak luhin a tibuai tur an vèn dawn thu a sawi.

ZPM Leader chuan, Mizoram tichhetu chu eirûkna a ni tih sawiin, "Eirûkna tibo tur hian nasa taka kan beih a, mipui kan ṭan rual a ngai," a ti a; ZPM sorkar hnuaiah restricted tender a awm ve a nih pawhin, mipuiah an tarlang vek zel dawn tih sawiin, "Tuna restricted tender kan hriat ang hi a bo tawh dawn. Nakkumah hian pawl hnih kan indo dawn a, ram damna duh leh duh lote kan inhmachhawn dawn a ni," a ti bawk.