Helicopter-a zinna atan Hawla'n Rs 57,12,000 a hman laiin, Zorama'n helicopter a la hmang lo - MNF Ṭhalai

Mizo National Youth Front (MNYF) chuan thuchhuah siamin, Lal Thanhawla'n chief minister a nih kum 10 chhunga helicopter-a a zinna atan sorkar sum Rs 57,12,000 hman a nih laiin, chief minister Zoramthanga'n helicopter a la hmang miah lo tih an tarlang.

MNYF chuan, Congress party-in rorelna an chan chhung khan ram hmasawnna ngaihsak loin nawmchenna lamah nasa takin an tlân niin an sawi a, "Sorkarna an chan chhunga CM khan a mimalin helicopter ṭum 53 a hmang (charter) a, helicopter chuan manah mipui sum Rs 57,12,000 hman ral a ni. MNF president leh CM Pu Zoramthanga chuan vawiin thlengin sorkar sum tihek turin helicopter vawi khat mah a la hmang lo," an ti.

Congress party hruai sorkar chu nawmchenna lama an tlân nasat avangin ram hmasawnna tur sum leh pai hai luh kawngah a ngaihna an hre lo nia sawiin MNYF chuan, "An mangan tàwpah kohhran leh khawtlang duh loh zu zuarin, fîm lo takin rorelna an kalpui. An MLA pangate'n an chhuahsan bakah, corruption kaihhnawih vangin an minister pahnih leh MYC chairman-te chu an báng," an ti a; MLA pakhat pawh seal lem siam vangin jail-ah a lut niin an sawi.