National Hydrology Project sawiho

Irrigation and Water Resources department (IWRD) IWRD hotute leh Mizoram Journalists' Association (MJA) hruaitute chu nimin khan IWRD conference room-ah IWR minister C Lalrinsanga an ṭhukhawm a, IWRD hnuaia National Hydrology Project (NHP) chungchang an sawiho.

C Lalrinsanga chuan, IWRD-in intodelhna tura thil pawimawh khawih a ngah tih sawiin, "Hmalakna a kalpui mekahte hian hmasawnna hna thawktu sorkar department dangte nen inkungkaihna leh inthlun zawmna a ngah hle. Vawiina kan dinhmun hmachhawn mek chauh ni lo, ṭhangtharte hmakhua atan a la pawimawh dawn ni," a ti a; loneitute tan malsawmna a thlen theih dawn thu a sawi.

NHP-in a tum chu - tui hna leh tui lakna hrang hrangte technology hmanga zir chiang a, data rintlak lak khawm leh ṭangkai taka hman a nih theihna tura pho chhuah a ni. Central sector hnuaia hmalakna a ni a, kum 2016-2024 chhunga kalpui tur a ni. Sum sen tur nuai 3,277 chu sorkar laipuiin a tum vek dawn a, cheng nuai 1,852.25 hmuh tawh niin, nuai 1,735.29 hman tawh a ni.

NHP HNUAIA HMALAK TAWH DAN
1) Mizoramah Hydro-Met data station 53 bun mek a ni.

2) Ruahtui tla zat tehna automatic rain gauge hmun 27-ah dah a ni tawh.

3) Hmun 10-ah automotatic weather station dah tur niin, pariat bun tawh a ni.

4) Lei chhunga tui awm zat hriatna piezometer hmun 20-ah bun tum a ni a, hmun 10-ah bun zawh a ni tawh.

5) Tui luang tehna gauging & discharge station hmangin lui 22-a hmun 27 teh tum a ni a, hmun 16-ah an zo tawh.