Zo-fa Ṭangrual Pawlin hma la turin Mizoram sorkar ngen

Zo-fa Ṭangrual Pawl (ZṬP) chuan nimin khan Aizawl Press Club-ah thuthar thehdarhtute an kâwm a; national highway zauh tura package 1&2 huam chin ṭhen dan avangin United Nations Declaration on the Rights of Indigenous Peoples (UNDRIP) behchhana hma la turin Mizoram sorkar an ngen.

ZṬP vice president Paul LT Chhangte chuan, NHIDCL-in NH kawngpui zauh tura package 1&2 an ṭhen danah, Mizoram chhung hmun ṭhenkhat chu Assam lam chanah dah a nih thu an sawi a; Assam sorkarin zangnadawmna a pek chuan Mizoram hmun eng emaw zat Assam sorkar hnena hralh ang a nih dawn thu a sawi a ni.

Paul LT Chhangte chuan, "Kawng ṭha kan neihna tur a ni tih hre mah ila, kan ram zau tak ziaka Assam lama dah a nih ai chuan kawngpui siam tur hi ui tak chunga kan hnâwl ngam rih a ṭhain kan hria. Survey of India-in official taka kan ram chin dik tak min siamsak hunah kawng ṭha tak siamna hun chu a la awm leh mai kan beisei," a ti.