Quarry chimah thubuai ziak lut thite Rs 2,00,000-in râl dawn

November 14, 2022-a Maudarha quarry chimin a chhilha thi chhungte hnenah Rs 2,00,000 ṭheuh pek a nih dawn thu prime minister Narendra Modi chuan a puang. Hetih lai hian, chhiatna thlengah hian National Green Tribunal (NGT) chuan thubuai a ziak lut.

Nimin tlai dar 5 thleng khan quarry chimin a chhilh mi 14 zinga mi 12 ruang hmuh a ni tawh a, he thu ziah lai thleng hian ruang pahnih la zawn mek ni. Ruang hmuh tawhte chu endik hnuah an awmna khua/state lamah thawn zel a ni.

Quarry chim chungchangah hian NGT Principal Bench chuan suo moto hmangin thubuai an ziak lut a; thubuai ziah luh a nih thu hi nimin khan NGT Assistant Registrar-in a kaihhnawih sorkar department leh thuneitu hrang hrang pasarih hnenah a hriattir.

Chhiatna thleng chungchang hi PM Narendra Modi chuan Prime Minister's Office kaltlangin nimin zing khan Twitter-ah a tarlang a, "Quarry chima thi chhungte ka tawrhpui tak zet. PMNRF (Prime Minister's National Relief Fund) aṭangin mitthi chhungte hnenah ràlna Rs 2,00,000 ṭheuh leh hliamte hnenah Rs 50,000 pek a ni ang," a ti.

Maudarh quarry chim chungchangah NGT-ah thubuai ziah luh a nih thu NGT-in a hriattirte chu - Central Pollution Control Board, Mizoram Pollution Control Board, Mizoram Geology and Mining department, Mizorama Minitry of Environment, Forest and Climate Change regional office, Disaster Management department, Lunglei DC leh ABCI Infrastructure Pvt. Ltd-te a ni.

Thubuai hi November 28, 2022-ah NGT-in a ngaihtuah dawn a, thuneitu hrang hrang pasarihte chu NGT hmaah inlan tura hriattir an ni.
Hnahthial DC tarlan danin, quarry chimin a chhilh zinga ruang hmuh tawhte chu West Bengal-a Nadia district mi pali leh North 24 Parganas district mi pakhat, Assam-a Cachar district, Goalpara district leh Barpeta-a mi pakhat ṭheuh, Jharkhand-a Chatra district mi pahnih, Lunglei district-a Zawlpui khaw mi pakhat leh Khojaisury khaw mi pakhat an ni.