CM Hawla leh Railways hotute inkâwm
Chief minister Lal Thanhawla chuan November 21, Thawhlehni tlai khan CM Bangla-ah North East Frontier Railways (NEFR) general manager (Construction) NK Prasad leh a thawhpuite a kâwm a, Mizoram chhunga rel kawng siam mek chungchang a sawipui.
CM Lal Thanhawla chuan, NE Frontier Railways chuan theihtawp an chhuah nia a hriat thu sawiin, Mizoram sorkar leh mipuiin an thlâwp tlat thu a sawi a; ṭhahnem ngai leh uluk taka hna thawh chhunzawm zel turin a chah.
Lal Thanhawla chuan, Bairabi-Sairang rêl kawng bakah, Indo-Bangla Border Trade point pawh tur te, Sairang-Kawrpuichhuah rel kawng siam tur leh KMMTTP kawngpuite chu Mizoram tan mai bakah India tan sumdawnna kawng pawimawh tak a nih tur thu a sawi a, "Tuna rêl kawng siam chu chak zawka thawh a nih theih nan Mizoram sorkar a inhawng reng a ni," a ti.
NE Frontier Railways hotute chuan, Bairabi-Sairang rêl kawng siam meka lei verh tur 23 zinga 22 an verh tlang tawh tih sawiin, harsatna dang an tâwk lo a nih chuan March 2020 chhungin Bairabi aṭanga Kawnpui thleng rel kawng siam zawh hman an beisei thu an sawi.
Kawnpui leh Sairang inkara rêl kawng siam chu December 2020 chhungin an zo hman dawn niin an sawi a; Sairang aṭanga Kawrpuichhuah thleng, km. 272-a thui rêl kawng siam dan tur pawh zirchianna an neih tawh thu leh survey zawh a nih tawh thu an sawi bawk.