Saiphai police-te thamna laah an puh ; MNYF-in titawp turin sorkar an phût

MNF ṭhalai, MNYF-te chuan, Serkhan-Bagha kawng aṭanga dan loa Mizorama hnam dang lut ru ṭhinte'n Saiphai Police checkgate-ah thamna an pek ṭhin thu leh, chu vang chuan zalen takin hnam dangte Mizoramah dan loa an luh ṭhin thu an sawi a; a ṭul anga hma la thuai turin sorkar an phût.

MNYF hruaitute hian nimin khan Aizawl Press Club-ah thuthar thehdarthtute an kâwm a; MNYF vice president H Ramdinliana chuan, Serkhan-Bagha kawnga Cachar ramri bul, Saiphai Police checkgate-ah hnam dang, Inner Line Permit (ILP) nei lote'n pawisa pein ni tin zalen takin Mizoramah an lut ṭhin nia sawi chu a hmunah an enfiah tih a sawi a, "Hei hi thu dik a ni tih kan hriatin pawi kan ti a, a ṭul anga hma la turin Mizoram sorkar kan phût a ni," a ti.

H Ramdinliana sawi danin, Saiphai Police checkgate-ah hian auto-rickshaw leh lirthei dang driver-te’n an motor-a chuang zawngte tan a hlâwmin police-ah pawisa an pe ṭhin a; chu'ng zingah chuan gunda leader an tih mai, Abdul-a, Kalahore khua chu a huangtau bik a, Vairengte Police checkgate leh Saiphai checkgate a kàr tawn reng a, dîpdâltu nei loin a che a ni. Dan loa rawn lutte chu Saiphai bakah, Bilkhawthlir leh Kolasib thlengin zalen takin an sumdawng ṭhin.

Abdul-a hian Saiphai Police checkgate-a hman turin dawhkan a pe a, dawhkan chu MNYF-in an tlawh lai pawhin an hmang a ni.

Saiphai Police checkgate-ah hian truck-in Rs. 5,000-6,000 vel an chawi ṭhin a; Mizoram páwn aṭanga bungraw lo lut leh Mizoram aṭanga phurh chhuahte chu phalna nei loin zalen takin an kaltlang reng a, Serlui leh Tuirial ruama thing leh mau lain, Cachar lamah an tawlhthla ṭhin a ni.

H Ramdinliana chuan, Saiphai checkgate-ah police pathum an duty a, thla tin an inthlak ṭhin tih sawiin, "Aizawl lamah report an pe a, checkgate paltlanga dân loa hnam dang lut an awm loh thu an thlen ṭhin tih hriat a ni," a ti. Chutih laiin, November 8, 2017 khan Tuirial leh Serlui ruama hruihnáng an lak khawm, truck trip chu Kolasib Group YMA hruaitute’n Saiphaiah an man tih a sawi.

Saiphai Police checkgate leh a chhehvela thil ṭha lo tak thleng mek chu ram leh hnam pawi khawihna lian taka an ngaih thu sawiin H Ramdinliana chuan, "Mizoram sorkar hian suamhmang misual a thawhpui em ni? Gunda leader pakhat hnuaia Mizoram police an kûn nia lang hi CM Lal Thanhawla’n Home minister R Lalzirliana kut a phuarsak vang em ni?" a ti a; Congress sorkar hnuaiah Mizorama hnam dang ILP nei lote a huangtau chu pawi an tih thu a sawi bawk.

MNYF hruaitute chuan, Sai­phai vela thil thlen dan an puanzar chu Mizoram sorkar an hrilh­hriatna a nih thu sawiin, "Thil thleng hi Congress sorkarin an titawp lo a nih chuan MNF ṭha­laite'n hma kan la ang," an ti.