MzSRMLN hnuaiah lirthei 18 pe chhuak

Rural Development department-in a kalpui scheme, Mizoram State Rural Livelihoods Mission (MzSRLM) hnuaia scheme pakhat Aajeevika Grameen Express Yojana (AGEY) hmanga lirthei 18 leite chu, self help group (SHG)-te hman turin nimin khan RD minister R Lalzirliana'n a vai liam.

Lirthei 18-te hi Bolero pick-up 13 leh sumo panga niin, RB Block pathum - Bilkhawthlir, Serchhip leh Tipa (Tuipang) chhunga SHG-te hman tur a ni a; nimina Tlangnuam RD Block pisa kawt aṭanga vai liamna inkhawmah hian Finance minister Lalsawta leh MLA K Lalrinthanga te pawh an tel a ni.

RD Minister chuan, retheihna ata pên chhuak a, mahni thiamthil leh theih zawng thawka eizawng tura duan SHG-te’n eizawnna leh hmalakna pui thei tura lirthei an dawng chu a lawmpui thu a sawi a; lirthei dawngtu SHG-te chu uluk tak leh fimkhur taka lirthei an dawnte hmang turin a chah.

R Lalzirliana chuan, sum lak luh dan leh a hman kawngah rinawm tur leh lirtheite chu in­nghirnghona awm loa inlungrual taka hmang tur leh hmang ṭangkai turin a chah a; teirei peih tur leh taimakna nena hma la zel turin a fuih bawk.

Lirthei hlanna leh vai­liam inkhawm hi RD secretary Lalhmingthanga'n a kaihruai a; MzSRLM chief executive officer H Lal­chhandami'n lirthei lei leh sem dan leh, AGEY hnuai­a hmalaknate a sawifiah.

AGEY-in a tum ber chu - thingtlanga SHG member-te sum lak luhna hmanrua leh khaw mipuite'n ṭangkai taka bazar, zirna-in leh damdawi-in kalna atana an hman tura tih a ni. Motor hi MzSRLM aṭanga Village Organisation (VO)-te hnena sum pek Community Investment Fund (CIF) hmangin leisak a ni a, SHG-te chuan a pung awm loin VO-ah kum ruk chhungin an rûl dawn a ni.

Tun dinhmunah MzSRLM hnuaiah SHG 2,980 leh VO 157 din a ni tawh a, district paruka RD Block 17-ah MzSRLM hian hma an la mek a ni.