CM-in MEFCOF Assembly a hmanpui

Mizoram Environment & Forest Consultative Forum (MEFCOF) chuan, nimin khan Lal Thanhawla Auditorium-ah Protection of Environment awareness campaign leh General Assembly an hmang a; chief minister Lal Thanhawla khuallian a ni.

Chawhma lama awareness campaign chu MEFCOF president VL Bela'n a kaihruai a; CM Lal Thanhawla chuan, India rama state dangte nen khaikhinin Mizoram chu Kerala nen state hring (green state) ber zingah an tel tih a sawi rualin, Mizorama ramngaw tak tak (dense forest) erawh chu 1% chauh a nih thu a sawi.

Lal Thanhawla chuan, Mizoram sorkarin kum 1998 aṭangin thing leh mau leh nungcha humhalh kawngah hma la tawh mah se, mipui mimir an la ṭhanharh tâwk loh avangin hmalak chak a har viau ṭhin tih a sawi a, "Mizote hi ringtute kan nih angin, Pathianin ram min pek hi duat taka enkawl leh Pathian­in ṭha a tih em em thilsiamte humhalh hna thawk tur kan ni lehzual a ni," a ti.

Chief Minister chuan, tuna Mizoram luah mektute'n ramngaw an humhalh a, ram an siamṭhat loh chuan ṭhangtharte'n anchhia an la lawh dawn tih sawiin, "Sorkar leh mipuite'n pheikhai rual takin Mizoram hi state entawn tlakah kan siam theih a ni," a ti a; ram siamṭhat hna chu mi tin mawhphurhna a ni tih a sawi.

MEFCOF General Assembly-ah hian Zotheihuan thlalak intihsiaknaa pakhatna aṭanga pathumnate hnenah Chief Minister-in lawmman a sem - Sangpuia Chhakchhuak chu pakhatna a ni a, pahnihna chu Aldrin VL Rochana niin, pathumna chu Zorama Khiangte, Lal­thlamuana leh PB Rosangliana te an ni.

Chawhnuah General Assembly an hmang a, MJA kaihhruaiin kum 2017-19 chhunga MEFCOF office bearer turte an thlang. President-ah VL Bela leh general secretary-ah Prof. Lalramnghinglova te an thlang a ni.