Hna thawk turin sorkar hnathawkte ngen

PRISM party chuan thuchhuah siam­in, sorkar hnathawkte hlawh atan ni khatah cheng vbc. 8.28 hman a nih thu an tarlang a; hlawh pun ngiata hna thawk lo sorkar hnathawk zawng zawngte chu hna thawk turin an ngen.

PRISM chuan, kum 2017-18 Mizoram budget aṭanga chhûtin, sorkar hnathawkte hlawhah ni tin cheng vbc. 8.28 hman a nih thu sawiin, "Ni hnih chhung hna an thawh loh chuan an hlawh chawi thlawn ringawt pawh cheng vbc. 16.56 a ni dawn. Hna an thawh loh vanga mipuiin harsatna kan tawh leh sorkar hmalakna châwl vanga kan sum hloh tur phei chu a tam hle dawn. Chuvangin, ṭha taka hna thawk turin sorkar hnathawkte kan ngen a ni," an ti.

Mizoram economy a chhe hle tih sawiin PRISM chuan, "Sorkar hian hmasawnna hna thawhna tur mai ni loin, inrêlbàwlnaa hman tur pawisa a indaih lo. 7th. Pay hi sorkar hnathawkte pek an nih chuan sorkar hian a pawisa neih zawng zawng deuh thaw hlawh leh thawktu enkawl nan a hman a ngai tawh dawn a ni," an ti a; sorkar hnathawkte chu hlawh tam zawk nei turin duhsak hle mah se, Mizoram economy-in a zawh loh avangin 7th. Pay anga hlawh pun chu tih chia an ngai loh thu an sawi.