PWNM kum 10 tlin an lawm

Positive Women Network of Mizoram (PWNM) chuan, nimin khan Whitestone Conference Hall, Ramhlun North-ah an pawl kum 10 tlin an lawm a; Health minister Lal Thanzara'n hmanpuiin, HIV documentary film ‘Beiseina’ a tlangzarh.

Health Minister chuan, Mizorama HIV/AIDS dona kawngah a natna vei ngeite'n pawl indin a, hmuhsitna leh endawngna hmachhawn ngama kum 10 chhung an lo thawh tawhna chu chhuanawm a tih thu a sawi a, "Mi dangte tana in thawh chuan mi tam tak tan HIV/AIDS natna a pumpelhtir ngei ka beisei a, HIV/AIDS natna hi kan hmelhriatna a la rei lo chungin, a darh nasa tawh hle a ni," a ti.

Lal Thanzara chuan, HIV/AIDS do leh a veite enkawl kawngah sorkar, kohhran leh pawl hrang hrangin nasa takin hma an la chungin a darh zau zel tih sawiin, "Nasa zawka hma lain kan thawhho a ngai a ni," a ti a; HIV hrik paite tana enkawlna leh a thlawna damdawi sem chhuahna Anti Retroviral Therapy (ART) chu ngai pawimawh a, a hun taka ei ṭhin turin leh, ei nacháng hre lote pawh hrilhhretu ni turin kalkhawmte a chah.

PWNM hi kum 2007-ah din a ni a, member 4,000 vel an awm mek. An thil tum zingah - HIV vei tawhte'n nun pangngai tak an neih theihna atana hmalak te, HIV/AIDS veite chunga thinhrikna leh endawngna tihtlem a nih theih nana hmalak te, HIV/AIDS darh zau zel tur ven nana hmalakte a tel a ni.