KHAWTHLIR

Press tour chhuak
NEDP leh IPR department hmalaknain, Mizoram district pariata chanchinbumi 10 leh IPR officer pahnih, Gujarat fang turte chu nimin khan Planning secretary Dr C Vanlalramsanga'n IPR Directorate aṭangin a vai liam. NEDP Press Study Tour-a kalte hian Gujarat-a hmun hrang hrang an fang dawn a, sorkar hmalakna leh company lian factory-te tlawhin, an hnathawh dante an zir dawn a ni.

Interim bail pe
MPSC-in tun hnaia Mizoram Judicial Service (MJS) examination a buatsaih chungchanga Court-a MPSC khingtu leh High Court-in document lem hmang an nih vanga a hnâwl tak, Dilip Kanti Chakma leh a ukil Joseph L Renthlei te chu nimin khan Vanlalengmawia Court-ah an inlan a; Joseph L Renthlei hi a dil angin interim bail pek a ni. Dilip Kanti Chakma leh Joseph L Renthlei te hi a hmain Court-in anticipatory bail a lo pe tawh nia thu dawn a ni.

Lirthei dah phal lo
PWD chuan nimin aṭang khan Kulikawn, Ngaizel kawngpui siam hna an thawk ṭan a, November 26 thleng an thawk ang. Traffic SP chuan thuchhuah siamin, Ngaizel kawngpuiah hian zing dar 8 aṭanga tlai dar 6 inkarah hna thawktute tibuai theiin lirthei dah phal a ni lo tih a tarlang a, lirthei pawh inkal chhâwk a ngaih dawn avangin, lirthei khalhtute chu hawihhâwm taka lirthei khalh turin a chah a ni.

Seminar buatsaih
Disaster Management & Rehabilation department leh Mizoram Psychological Association chuan nimin aṭang khan Hrangbana College seminar hall-ah ni thum awh tur, 'Workshop on Psychosocial Care in Disaster Management' an buatsaih ṭan a,November 24 thleng a awh ang.YMA branch hruaitute tana buatsaih niin, YMA branch-te chu batch thumah ṭhenin an intel chhâwk dawn a ni.