Riverine Reserved Forest ṭhiah a nih lon nan Central YMA-in chak taka hmalak an rem ti

RRF ṭhiah a nih chuan Tuirial HEP atana ram lâkah zangnadawmna pek leh tur an tam dawn

Gauhati High Court-in Riverine Reserved Forest (RRF) notification a ṭhiahna Mizoram sorkarin a khinnaah Mizoram sorkar a inhnûkdawh tâk avangin, Central YMA chuan RRF ṭhiah a nih lohna atan chak taka hmalak zui an remti.

CYMA hnuaia CEC chuan November 16, Nilaini khan RRF chungchang hi a ngaihtuah a, ṭhiah a nih lohna atana chak taka hmalak remtiin, "Helam kawnga hmalatu hrang hrangte hmalakna chak zawka kalpui a nih theih nan hmalak remtih a ni," an ti.

Vanglaini palai zawhna chhangin CYMA president R Lalngheta chuan, Court-ah a hranpa-a kal leh an tum tawh loh thu a sawi a, "Centre for Environment Protection (CEP)-ten RRF ṭhiahna order hi court-ah an la khing mek a, anni hi theihtawpa puih leh ṭawiawm kan tum a ni," a ti.

CYMA hian RRF notification ṭhiahna order hi Mizoram sorkarin a khinglet dawn loa a hriat avangin khinlet a tum a, Mizoram sorkarin a khinlet leh tâk si avangin thui tak hma la tawh mah se, hma a la chhunzawm mumal ta lo a ni.

Mizoram sorkar RRF noti­fication ṭhiahna a khinletna aṭanga a inhnuhdawh leh tâk si avangin CYMA chuan hmalak dan tur an ngaihtuah ṭha leh a ni.

Vanglaini thu dawn danin, Mizoram Chief Secretary-in August 5, 2016-a order a chhuah leh January 28, 1965-a notification a tihchhuah, The Mizo District (Forest) Act, 1955-a Section ṭhenkhat chu mi 681-in GHC, Aizawl Bench-ah an khing a ni. An khin hneh chuan mi 681 hnenah zangnadawmna cheng nuai 3,000 chuang Mizoram sorkarin a sèn belh a ngai dawn .

Chief Secretary order leh January 28, 1965-a notification ang chuan, Tuirial Hydel Project siamna atana ram lâk neitu mi 681-te ram chu forest reserved chhunga awm a nih avangin zangnadawmna an dawng thei lo. Mah se, mi 681-te chu GHC-ah an zualko a, Court chuan thu­tlukna siamin, mi 681-te hi an chak. Hei vang hian mi 681 hnenah Mizoram sorkarin zang­nadawmna a pek a ngai dawn.

Hetihlai hian, Mizoram sorkar hi inhnukdawk tawh mah se, Centre for Environment Protection (CEP) chuan Gauhati HC Single Bench-in RRF notification ṭhiahna order chu khin lêt phalna Supreme Court-ah an dil a, Supreme Court-in phalna a pek angin High Court-ah an khing lêt mek a ni.

CEP khin lêtna hi chu Gau­hati HC Chief Justice telna Division Bench (Principal Bench) ngaihtuah tura dah a ni a, hei vang hian RRF notification ṭhiahna thupek khin lêtna chu a la tàwp vek lo a, la ngaihtuah zui zel tur a nih thu CEP hotute chuan Vanglaini an hrilh.