Hachhek biala total bandh titawp; Duty-ten ruihhlo nia rinhleh an man

Hachhek Bial Kuhva Chingtu Pawl (HBKCP) bul tuma an kuhva rah tharte hralh a nih theihna atana hmala tura sorkar phutna atana November 16, Nilaini zing dar 6 aṭanga Hachhek bial chhunga total bandh buatsaih chu nimin tlai dar 3 khan tihtawp a ni. Hetihlai hian nimin zing khan Kawrthaha duty-te chuan truck pakhat aṭangin ruihhlo nia rinhleh an man.

Vanglaini thudawn danin, total bandh huaihawt a nih avanga duty-te chu nimin khan Kawrthah SDC chuan kalchilhin, an thil phut chungchanga sorkar hmalakna hrang hrangte hrilhin, bandh titawp turin a ngen a ni. Total bandh huaihawttute chuan sorkar hmalakna ngaihchan leh rih rem tiin, tlai dar 3-ah bandh an titawp a ni.

HBKCP hruaitute chuan vawiin hian Mamit Press Club-ah thuthar thehdarhtute an kawm dawn a, an hmalak zel dan tur an sawi rin a ni.

Hetihlai hian, Kawrthaha duty-te chuan nimin zing khan Ashok Leyland AS 01M C - 8157, Karimganj, Assam motor nia hriat chu an lo ti dinga; motor-ah hian kuhva rah, UAE siam cigarette, ruihhlo chi khat opium siamna poppy seeds nia hriat leh iskut ip eng emaw zat phurh a ni.

Kuhva rahte hi hal ral nghal niin, iskut erawh chu police hnenah hlan a ni a; poppy seeds nia hriat leh UAE cigarette-ah hian NDPS Act hnuaia thubuai ziahluh theih a nih loh avangin vawiin hian police-te chuan Custom hnenah an hlan dawn.

Lirthei khalhtu hian Sihphir Iskut Growers Association lehkha a nei a, heta ṭanga a lan dan chuan Agartala-a dah tur iskut bag 205 a phur a ni.