Mizoram leh Assam sorkar hotute an inbia ; Ramria Mizoram dinna BEFR, 1875 - HM Chama

Nimin chawhma dar 11 aṭang khan Guwahati-ah Mizoram leh Assam sorkar hotute ramri chungchangah an inbia a, an inbiak zawha thuthar thehdarhtute an kawmnaah Mizoram team leader Home minister Lalchamliana chuan, ramria Mizoram sorkar dinna chu Bengal Eastern Frontier Regulation (BEFR) 1875 a nih thu a sawi nawn.

Assam leh Mizoram sorkar aiawhte chuan inbiaknaah hian thuchhuah inṭawm an siam tawhte thlirletin, chûng ngaihtuah chunga hmalakna awm thei nia an ngaihte an sawi a; hun rei tak sawihona an neih hnuin thuchhuah inṭawm 'joint declaration' siam a ni. Thuchhuah inṭawmah Mizoram sorkar aiawhin Home minister Lalchamliana'n hming a ziak a, Assam sorkar aiawhin Border Protection & Development minister Atul Bora-in hming a ziak thung.

Thuchhuah inṭawm ziah a nih hnuin Atul Bora chuan thuthar thehdarhtute hmaah joint declaration hi a chhiarchhuak a ni.

Lalchamliana chuan Mizoramin ramri a pawm chu BEFR 1875-a inziak ang a nih thu a sawi a, "He kan ṭanchhan tihchian nan joint verification kan rawt a, Assam lam chuan hemi atan helai bawra chanchin kimchang lakkhawm ni se an ti thung. Kan ṭan chhan tihchian nan thla thum chhungin detail-te kan lakhawm ang," a ti.

Mizorama kuhva chingtute'n tunhnaia an tharchhuah Mizoram pawna Assam kaltlanga phurchhuahna kawngah nasa takin harsatna an tawk mek tih sawiin Home Minister chuan, "India ram chhunga khua leh tuite'n an tharchhuah hralhna kawnga hetiang taka harsatna an tawk hi a vanduaithlak," a ti a, chinfel a nih vat thei nan Mizoram leh Assam sorkarin a rualin sorkar laipui an nawr a ṭul thu a sawi.

Home Minister sawi danin, Mizoram sorkar chuan ramdang tharchhuah kuhva Mizoram leh state dangte kaltlanga tawlhruk chu a veiin, a la thu tak hle a ni. Heivang hian tun hnaiah dan kalha kuhva tawlhruk man a nih thei nan check post pahnih siam belh a ni.

Inbiaknaah hian Home Minister hi Rural Development minister Lalruatkima, Home secretary H Lalengmawia, joint secretary Lalthiamsanga Sailo leh OSD cum joint secretary David H Lalthangliana te'n an ṭawiawm.

Assam aṭang chuan Border Protection & Development Minister bakah, Environment & Forests minister Chandra Mohan Patwary, PCCF MK Yadav leh official dangte an tel.

Joint declaration
# Mizoram sorkarin ramri nia kan pawm chhunga khua awmte, an area huam te, a geo spatial extent te, heng hmun chengte hnam chanchin leh chite (ethnicity) leh chanchin dangte chu thla thum chhunga lakhawm nise

# Heng chanchin thehluhte hi ramri buai chinfel tura atana la din tur state pahnih aiawte telna Regional Committee-ten an enfel ang. Chanchin lakkhawm kawngah hian Assam sorkar chuan Mizoram hi a theihna apiangah an pui ang

# August 5, 2021 a Aizawla inbiakna neih ṭuma thuchhuah inṭawm siam chu state pahnihten vawng nung zel rawh se

# State pahnihten ramri hrula cheng mipuite inkara boruak muanawm a awm zel thei nan thawk chhunzawm zel ni se

# Mizoram High Level Delegation-in Mizorama kuhva chingtuten an tharchhuah state pawna Assam kaltanga an phurhchhuahnaa harsatna lian tak an tawh mek chungchang chu state pahnih Chief Minister-te hnenah hei hi thlen ni se.