Kut hnathawktute dâwm chhuah Kan policy pui ber - ZPM Leader

ZPM leader Lalduh­oma chuan November 16, Nilaini khan Tuivawl bial chhung, Kepràn leh Pehlàwn khuaa vantlang inkhawmah thu sawiin, ZPM policy pui ber chu kut hnathawktute dâwm chhuah a nih thu a sawi.

Lalduhoma chuan, mithiamte nen ngun taka an zirhona angin hna an thawk dawn tih sawiin, "Crop zone kan siam ang a, sik leh sá leh a ram leilung azirin thlai kan chíng dawn a ni," a ti a; ṭhalaite tuihâlna an hrethiam nia sawiin, "Anmahnia an din theihna turin kan pui dawn a ni," a ti.

Mizoram siamṭhat chu thil huphurhawm tak leh thil harsa a ni lo tih sawiin Duhoma chuan, "Siamṭha tur hian ZPM chuan theihtawp kan chhuah. Chutih laiin, mipui hi an lo ding chhuak ang a, kan intodelh ang tih hi hlau ngawih ngawih kan awm," a ti a, chutiang mite nen chuan an inhmachhawn mek thu a sawi.

Lalduhoma chuan, Mizoram ṭhanmawhbáwk chu eirûkna a nih thu sawiin, "Tute emaw chu term khat minister leh MLA an ni dék dék a, in lian tak tak an sa a, ram zau pui pui an lei nghal thei mai zel. Heng mite hi an eiru lai hmuh kher a ngai lo, an chet danah a lang vek a ni," a ti.

ZPM Leader chuan, "Eirûkna do chung­changah political party chauh ni loin, kohhran leh NGO-te an harh nasa tawh zawk niin a lang ta a, a lawmawm hle a ni," a ti a; eirukna chu ram pum anga do turin eiruknaa inhnamhnawihte hnâwl a ngaih thu a sawi bawk.