Mizoramin kum 32 chhunga leiba a nei leh tunhnai kum 3 leiba a inzat thuak - MPCC

MPCC Media-te chuan nimin khan Aizawl Press Club-ah thuthar thehdarhtute an kawm a, Mizoram state a nih hnu kum 32 (1987-2019) chhunga Mizoram leiba aiin, tunhnai kum 3 chhunga Mizoram leiba a inzat thuak thu an sawi a, "Leiba thangah Mizoram a táng mek," an ti.

MPCC Media chair­man Dr Lallian­chhunga chuan, sum leh pai enkawlna lamah MNF sorkar an talbuai em avangin Mizoramin harsatna nasa tak a tawk tih sawiin, "Kum 2018 Congress sorkar kum tawp thleng khan Mizoram sorkarin leiba cheng vbc. 7,315 kan nei a ni," a ti a, MNF sorkar hnu kum 3 chhung (2019-2022) in Mizoram leiba chu cheng vbc. 12,553.08-ah a pun chhoh tâk thu a sawi.

Kum 32 chhung leiba leh kum 3 chhung leiba a inzat thuak tih sawiin Dr Lallianchhunga chuan, "Hetiang khawpa leiba pung chak hian Mizoram sorkar hi a la awm ngai lo. Sum leh pai enkawlna kawngah MNF sorkar ang em ema hlawhchham leh talbuai hi Mizoramah an la awm ngai hek lo. Hei hi Mizoram mipuiin kan hrawn mek MNF sorkar ṭhat lohzia chiang taka tilangtu a ni," a ti.

MPCC Media Chair­man chuan MNF sorkarin sum leh pai mamawh hmuh nan pûk tur a hriat apiang a pûk ta hmiah hmiah nia sawiin, "Sorkar hnathawk hlawh pek dawn apiangin pûk tur a zawng a ni ber," a ti a, MNF sorkar chuan sorkar lo awm leh tur tan pawha rulh huphurhawm tak, chet ti harsa tham a hnutchhiah ngei dawn thu a sawi.

Sorkar hnathawkten a hun takah hlawh an lak theih tawh loh thu sawiin Dr Lallianchhunga chuan, "GP fund an la thei hek lo. Pension-te pawhin chhuahpui nghal tur pawisa an nei thei ta loa, health care hnuaia inziaklut chhungkaw sang tam takte medical bill pawh a pe thei lo. Contractor-ten bill an la thei lo bawk. Heng hian nasa takin ram chhung sum leh pai chevelah nghawng a nei a, a nghawng chhe tak mipuiin kan tuar mek a ni," a ti.

MPCC Media chuan chhan tam tak avangin sorkarin leiba a nei lo thei lo tih sawiin, "Chuvangin, state kan nih hnu kum 1986 aṭangin leiba kan nei chho ve reng a, kan rul reng bawk a ni. A changin leiba a pungin a tlahniam ṭhin," an ti a, MNF sorkar ang em em hi chuan leiba engtik hunlai maha a pun ngai loh thu an sawi.

MPCC Media tarlan danin, MNF MLA fel tak tak awm mah se, a lu ber Chief Minister enkawlna hnuaiah an duh ang thil ṭha pawh an ti thei lo a, thil ṭha an hriat pawh an sawi chhuak ngam lo a ni. An mit hmuh lai ngeiin Mizoram chu leiba thangah a tang mek a, ṭawngkam thiamna ringawtin ram min hruai ṭha lo tih Mizoram mipuiin a takin kan hre mek a ni.