G-20 meeting Aizawlah nghah a ni dawn

Union Tourism minister G Kishan Reddy chuan, India ramin G-20 start-up meeting (intawhkhawm) a thlen tur chu Aizawlah pawh nghah a nih dawn thu a sawi.

Mizorama nghah mek International Tourism Mart 2022 (ITM) hmang tura rawn zin G Kishan Reddy hian nimin tlai khan Aijal Club-ah thuthar thehdarhtute a kâwm a; ITM 2022 chu hmarchhak state hrang hranga G-20 meeting neih tur hmahruai a nih thu sawiin, hmarchhak khawpui hrang hrangah India-in G-20 meeting a thlen tur chu nghah a nih dawn thu a sawi a, "Aizawlah pawh G-20 start-up meeting nghah a ni dawn," a ti.

Union Tourism Minister sawi danin, G-20 start-up meeting neih tur chungchangah hian sorkar laipuiin hmarchhak state hrang hrangte a dàwr tawh. G-20 hi ram/pawl hrang hrang 20 intêlkhawmna a ni.

G Kishan Reddy chuan, hmarchhak state-te'n tourism lamah theihna sang tak an neih thu sawiin, "Khawvel ram danga kal chhuah kher ngai loin hmarchhak state-ah tourist-te tana tlawh tur hmun mawi leh ṭha tak tak a tam a ni," a ti a; chutih rualin, ruhrel din chungchangah hmalakna tur tam tak a awm thu sawiin, chu chu sorkar laipuiin a ngaih pawimawh thu a sawi.

Tourism lama hmasawn turin inkalpawhna ṭha a pawimawh thu sawiin Kishan Reddy chuan, hmarchhak state khawpuite chu rél kawnga inpawhtir tum a nih thu a sawi a, "Mizoramah pawh hmalak thuai kan beisei a, kum 2025-ah chuan tihpuitlin hman kan tum. Hmarchhak state hrang hrangah domestic tourist bakah, international tourist tam tak an la rawn kal kan beisei a, chumi tur chuan inkalpawhna tihchangtlun zel a ni ang," a ti.

Union Tourism Minister chuan, prime minister Narendra Modi-a'n hmarchhak bial a ngaih pawimawh thu sawiin, "Meeting reng rengah hmarchhak bial a sawi lang ngei ngei ṭhin," a ti a; hmarchhak bialah mipuite nen ṭangrualin hmasawnna chak taka kalpui zel a nih dawn thu a sawi.

DoNER minister ni bawk Kishan Reddy chuan, hmarchhak state khawpui tinah Ministry of North Eastern Region (DoNER) office hawn tum a nih thu a puang a; zawhna chhángin, Delhi leh hmarchhak state khawpui inkarah thlawhtheihna ni tin a thlawh theih nan hmalak a nih tur thu a sawi bawk.

G Kishan Reddy ṭawiawmtu Mizoram Tourism minister Robert Romawia chuan, Mizoram chu tourism lamah bul ṭan mek a nih thu sawiin, "Tourism-ah theihna sang tak kan nei a, ram chhung leh ram pawna khualzinte kan lo welcome reng a, kan ram mawina min rawn hmuhpui turin India ram leh ram danga khualzinte kan sáwm a ni," a ti a; chutiang tur chuan Mizoram theh lâr kawngah Mizoram leh hmarchhak state-a thuthar thehdarhtute a sáwm.

Zawhna chhangin Robert Romawia chuan, Bung Banglaa Institute of Hotel Management chu Covid-19 léng avangin an tum hunah hawng thei lo mah se, tunah chuan bungrua chi hrang hrang dah a nih tawh thu leh hawn thuai tum a nih thu a sawi a, "IHM hi public private partnership (PPP) mode-a kalpui kan tum a, PPP mode-a thawhpui tur kan zawng mek," a ti.

Tourism secretary Manisha Saxena pawhin, IHM-a thawk tur lakna buaipui mek a nih thu a sawi bawk. Press conference-ah hian Union Tourism Minister hi minister Robert Romawia Royte bakah, Union Tourism secretary Arvind Singh, Mizoram Tourism secretary Manisha Saxena, PIB additional director general Nanu Singh leh Tourism senior economic adviser Gyan Bhusan ten an ṭawiawm a ni.