DC-ten buhfai semna hmun an enfiah
Aizawl district bawrhsap Dr Lalhriatzuali Ralte chuan November 16, Nilaini khan Aizawl East District Civil Supplies Office hnuaia Electric Veng, Chhinga Veng leh Aizawl Venglai retailer-te buhfai semna hmun a enfiah a; mipui tana hmuh awlsam tur leh hman ṭangkai theih tura Vigilance Committee member list tarlanna leh complaint thehluhna tur remchang siam turin DCSO leh retailer-te a hriattir.
Bawrhsap hian retailer-te'n buhfai leh thil dang, Public Distribution System (PDS) kaltlanga mipui hnena sem hna an thawh dan a enfiah a; mipui tana hmuh awlsam tur leh hman ṭangkai theih tura Vigilance Committee member list tarlanna leh complaint thehluhna tur remchang siam turin DCSO leh retailer-te a hriattir a ni.
Hnathawhna sawn avanga ration lakna hmun sawn kawnga harsatna awm ṭhin chu One Nation One Card scheme hmangin card siam danglam ngai loin awlsam taka retailer-te kaltlanga sutkian theih a nih thu sawiin Dr Lalhriatzuali Ralte chuan, "Mahni awmna hmun zel aṭanga lak theih a ni tawh a, he hamṭhatna hi mipuite hriattirin zirtir uar zel ang che u," a ti a, ration semna hmunte chu mipui tana hriat hran awlsam zawka rawng inang veka chei ṭhat ni se a duh thu a sawi.
Bawrhsap chuan ration la tura intlar mipuite chu an retailer leh buhfai semna kawngah harsatna an neih leh neih loh te a zawt a; Supply department hotute nen e-pos khawl hmanga buhfai sem kawngah mipui tana harsatna awm theite sutkian dan tur an sawiho nghal bawk.
Champhai district bawrhsap James Lalrinchhana pawhin nimin zing khan Champhai khawpuia ration buhfai lakna (fair price shop) pariat a enfiah a; buhfai semtute chu mipui dikna leh chanvo ngaipawimawh hmasa turin a chah.
James Lalrinchhana chuan, buhfai semtute chu mipui dikna leh chanvo ngaipawimawh hmasa tur leh dan hnuaiah rinawm taka thawk turin a chah a; "Mipui pawhin an dikna leh chanvo te an hriat a, dan loa thil tih awmte do kawngah ṭanrual a ngai. Consumer Rights Redressal Forum tha tih chak deuh deuh a ṭul a ni," a ti.
Retailer-te chu harsatna an neihte thuneitute hnena thlen thuai ṭhin tur in a chah a; hmunhma a enfiahna aṭanga hmasawn ngaihna laite a sawipui bakah, retailer-te dinhmun tlangpui tarlanna signboard felfai tak ni tina vawng tur te, mipui tana hamṭhatna awmte hrilhhriatna poster tarlang tam tur leh faina ngaipawimawh turte in a chah.