Pensioner-te harsatna chingfel turin CM phut

Mizoram Pradesh Youth Congress Committee (MPYCC) chuan nimin khan chief minister Zoramthanga hnenah lehkhathawnin, Krismas hma ngeia pensioner-te harsatna chingfel turin an phut.

MPYCC chuan an lehkhaah hian Mizoram Civil Pensioner Association chuan an pensioner puite harsatna sutkian nan Union Finance Minister hnenah September 29, 2022 khan SOS message lehkha hial an thawn tih an hriat thu tarlangin, "Hei hi a pawi kan tiin, zahthlak kan ti hle a ni," a ti.

MPYCC huan, "Hetiang em em-a kan ram sum dinhmun a tlachhe ta mai leh chhungkaw sang telte'n ṭah leh haṭhialna hun an tawng mek hi pawi kan tiin, sorkar kalphung ṭha lo lutuk hi kan dem takzet," an ti a, pensioner-te'n an dikna leh chanvo dik tak an chan hma loh chuan theihtawp chhuahpui an tum thu CM hi an hriattir.

September 2022 thlenga pensioner 1367 te an pension leh GPF etc. a an lak tur hrensak mek chu cheng nuai 24,987 a nih thu tarlangin MPYCC chuan, "Krismas 2022 kan lo thleng chho leh dawn hnai ta a, kan hunpui hi pensioner-ten hlim tak leh thlamuang taka an hman ve ngei theih nan an pension pawisa hi Krismas hma ngeia pe tur leh chinfelsak vek turi kan phut tlat che a ni," an ti.