HTE Minister leh college principal-ten College tihhmasawn chungchang an sawiho

Higher & Technical Education (HTE) minister Dr R Lalthangliana hoin Zirtiri Residential Science College, Durtlang Leitan-ah November 16, Nilaini khan Mizoram sorkar hnuaia college principal leh sorkar hotute an ṭhu khawm a, thawktu indaih lohna leh college tihhmasawn chungchang an sawiho.

Dr R Lalthangliana, chuan Zirtiri Residential College in Grade A a hmu chu a lawmpui thu a sawi, "College building ṭha neih tluk zeta pawimawh chu academic quality ṭha neih a ni a, ṭan la zual sauh ang che u," a ti a, Grade A college pawh neih belh zel tura ṭan lak a ngaih thu a sawi.

College hmunhma ṭha awm tam tawk lo chu pawi a tih thu sawiin Minister chuan, "Kan college neih chhunte hmunhma ṭha taka humhalh chu kan tihmakmawh a ni," a ti a, KVS la awm lohna district a awm nual chu pawi a tih thu leh college tihhmasawnna tur sum a awm nual theih dawn avangin principal ṭheuhte chu hma la turin a chah bawk.

HTE Minister hian College principal pension tawh mi pariat hnenah Mizoram College Principals' Council-te siam Certificate of Appreciation a hlan nghal a ni.

Sawihonaah hian faculty leh non-teaching staff indaih lohna te, LDC, Group D leh PE thlenga indaih lohna phuhruk dan tur te, college hmunhma leh building lama harsatna hrang hrang tihhmasawn dan tur leh college zirlaite hmasawnna tur hrang hrang an sawiho a ni.