BJP aṭanga hnawhchhuah mi ṭhenkhatin BJP President báng turin an phût

BJP Mizoram Pradesh-a hruaitu ni ṭhin mi ṭhenkhatte chuan an party president Prof. JV Hluna chu báng turin an phût.

Hetih lai hian, Mizoram BJP chuan thuchhuah siamin, BJP aṭanga hnawhchhuah leh kawhmawh báwl ṭhinte'n Mizoram BJP tihbuai an tum ṭhin nia sawiin, pawi an tih thu an tarlang.

BJP-a awm tawh ṭhin nia insawi, Mizoram BJP president Prof. JV Hluna báng tura phûttute hian nimin khan Prof. JV Hluna hnenah lehkha an thehlut a; convener C Laldinliana leh secretary K Lalchhanhima ten hming an ziak.

Prof. JV Hluna báng tura phûttute hian BJP President chu thlan tlin ni loin, ruat a nih thu te, party member a hnawh chhuah ṭhin thu te, party constitution zah lo takin district, mandal leh unit a ṭhiah ṭhin thute an tarlang a; party sum dik lo taka hmangah an puh bawk.

Hetih lai hian, Mizoram BJP thu­chhuah chuan, BJP Mizoram Pradesh President báng tura phûttu, BJP aṭanga suspend tawhte chu political party dang palaite an nia an ngaih thu a tarlang a, "Party dang hian BJP-ah pawisa a tam an tih vanga chumi beiseia lo lut a, ram aia mahni inhmangaihtute chu an tâl buai ṭhin a, nihna khelh vang leh mahni ṭánghma hai vanga buaina awm hi a pawi hle. Hetiang mi hi BJP Mizoram Pradesh leh Mizoramin kan mamawh lo," a ti.

Mizoram BJP chuan, BJP aṭanga kawhmawh báwl ṭhinte chu BJP hminga thil ti tawh lo tur leh, anmahni tírtu party-ah lungawi taka awm mai turin kan chah a ni.