Journalist-te'n Amul hmunpui an tlawh

NEDP hnuaia press study tour neia Gujarat tlawh mektu MJA member-te leh IPR hotute chuan, nimin Anand khuaa Amul hmunpui an tlawh a, thawktute'n an hnathawh dan an lo hrilhfiah. Anand hi Amul din ṭanna hmun a ni.

Mizorama Amul industry din ve tura ngen­na chhángin Amul hotute chuan, Mizoramin an mamawh khawp bawng­hnute an thar hrih loh avang­in tun dinhmunah chuan din theih a nih loh thu an sawi a, "Hmar­chhakah chuan Guwahati-ah kan din tawh a, an bawnghnute mamawh aia tam he lam aṭangin kan thawn a ni. Rél hmangin kan thawn a, Mizoram chu rél a lut bawk si lo a, tih ngaihna a awm rih lo," an ti.

Amul hotute sawi dan­in, bâwng leh láwi vulhtu, an hnena inziak lutte chu an bawng hriselna din­hmun an endiksak ṭhin a, hnute sâwr tur tam zawk an neih theihna atan an ran vulhte enkawl dan zirtirin, an khuaa hmun bik an siamah a man pe nghalin bawnghnute an leisak ṭhin bakah, an ran damloha an koh theih turin ni khatah darkar 24 chhung doctor duty an ngaihtuahsak a ni.

Amul hi kum 1973-ah din a ni a, village society 18,549 hnuaiah member nuai 36 an awm mek. Chawlrualin, ni tin bawnghnute litre nuai 176.5 an la khawm a, kum 2016-17 chhunga an sum che vel chu cheng vbc. 27,043 a ni.

Press tour-a kalte hi Gujarat sorkara secre­ta­ry (GAD, etc.) Lalnunmawia, IAS-in a lo buaipui a, an thlenna tur leh hmun pawimawh an tlawh turte a lo ruahmansak a ni.