KHAWTHLIR

Truck-in chíl hlum
November 22, Nilaini zan dar 11 vel khan Zakawt kawngpui sira kea kalna (footpath) siama hna thawk mek Zoramsanga h/o Lalrinkimi, Chanmari West, Aizawl chu truck-in a chîl a, damdawi-in panpui a nih hnuah a hliam tuar loin a thi. Truck driver hi police-in an man nghal a ni.

Hmeichhe Ni
Vawiin November 24 hi Prebyterian Kohhran Hmeichhe Ni a ni a, Presbyterian Kohhran Hmeichhiate chuan bial huap leh kohhran mal huapin ṭha an tih angin an hmang dawn. Kumina Kohhran Hmeichhe Ni-ah hian thupui inang tlang - Krista vanga martarte - Rohmingthangi leh R Lalbiakchhungi te chanchin an zir dawn a ni.

FIR thehlut
Mizo Students' Union (MSU) General Headquarters chuan Chakma leh Bru-te chu dan loa tribal scholarship dilah ngaiin, an lakah nimin khan Bawngkawn Police Station-ah FIR an thehlut. MSU hian FIR hi an vice president Benjamin Lalnghaka Fanai hmingin an thehlut a; dan loa thil titu Chakma leh Bru-te chu man chhuah a, dan anga hrem an nih theih nan hma an lak zel dawn thu an tarlang.

SS zirlaibu
Presbyterian Kohhran chuan kum 2018-a Nilai leh Beihrual Thupui leh Puitling Sunday School zirlaibu a tichhuak a, Synod Bookroom hrang hrangah lei theih a nih thu an tarlang. Rev.Dr K Lallawmzuala ziah puitling SS zirlaibu 'Chronicles I & II hrilhfiahna' chu copy 80,000 chhut niin, Rs. 100 man a ni a; Nilai leh Beihrual thupui, 'Thuthlung Hlui leh Thuthlung Thar inkar thu' chu copy 65,000 chhût niin, Rs. 130
man a ni.

Lungleiah seminar
November 22, Nilaini khan Lunglei Convention Centre-ah Haggai Insitutute Advanced Leadership Seminar ṭan a ni a, nimin khan chhunzawm a nih bakah, vawiinah pawh neih leh a ni ang. Seminar-ah hian college-a assistant professor te, doctor-te leh kohhran hruaitute an tel a ni.