Sorkarin thawktu mi 36 a bân avangin MBOCWWB-in harsatna a tâwk lo

Mizoram Building and Other Constructions Workers Welfare Board (MBOCWWB)-a thawk tura lak mi 36-te bàn an nih hnuah thawktu dang lak a la ni leh lo a; thawktu lak belh ni lo mah se, MBOCWWB-in hna thawh kawngah harsatna a tawh phah lo niin Labour, Employment, Skill Development & Entrepreneurship (LESDE) department hotute chuan an sawi.

Vanglaini palai zawhna chhangin LESDE joint director K Valy chuan, MBOCWWB-a thawkte zawng zawng, mi 36 chu bàn ni tawh mah se, MBOCWWB hnathawh kawngah harsatna a awm lo tih a sawi a, "LESDE department aṭangin thawktu ṭhenkhatin MBOCWWB an hmui a, harsatna a awm lo. A hma aiin a kal mumal tawh zawk a, district-ah pawh dik takin a kal tawh a, cess (contractor aṭanga chhiah 1%) lak pawh a mumal tawh zawk," a ti.

LESDE Joint Director sawi danin, MBOCWWB hna kal mek kalpui tur hian LESDE department aṭangin Secretary, DLC, ALO, Assistant, LDC leh computer operator pakhat ṭheuh leh MR pahnih an awm mek a ni.

K Valy chuan, contractor aṭanga cess lak tling khawm zinga 5% chu MBOCWWB inrêlbâwlna (administration) atan dah a nih thu sawiin, chu chu MBOCWWB-in a lo hmang pel nasa ṭhin tih a sawi a, "Motor-te an lo lei nasa a, two wheeler tel loin motor paruk an lei hman a ni," a ti a; motor-te chu hralh ṭhen a ni tawh a, tunah chuan motor pahnih chiah an kawl tawh niin a sawi.

MBOCWWB-ah dan lo leh a hmanna tur dik tak ni loa sum hman a tam ṭhin tih sawiin Vally chuan, "Dan loa sum hman a tam a, labour tan ni lo, mi programme ṭanpui (sponsor) nante an lo hmang nasa tih hmuh a ni," a ti.

MBOCWWB-a thawk tura lakte chu dan tlawh chhan awm loa lak vek an nih thu leh full pay salary pek an nih thu sawiin, "Dan loa lak an ni tih hmuh chhuah a nih hnuah, Chief Minister pawmpuinain bân vek an ni," a ti a; thawktu lak thar a nih hma chuan LESDE department-in a hmui rih thu leh, hun lo la kal turah chuan pisa hran nei loin, LESDE department nena awm dun tura ruahman a nih thu a sawi.

LESDE Joint Director chuan, BOCWWB ang chi chu state dangah pawh a nodal department-in an kengkawh mai nia sawiin, Assam-ah pawh Welfare Board bikah thawktu muster roll mi pahnih/khat bak an awm lo niin a sawi a; chutih rualin, Board chuan dan ang thlapin thawktu mi 11 emaw lak thar tur a rel a, mahse, a hmanhmawhthlak loh thu leh, a lak dan tur chu sorkar thu a nih thu a sawi bawk.