Mizoram EDUSAT Network hawn a ni

SCERT-a Mizoram EDUSAT Network siam thar chu nimin khan SCERT auditorium-ah School Education minister H Rohluna’n a hawng.

Minister H Rohluna chuan, Mizoramah EDUSAT Network hawn a ni ta chu lawmawm a tih thu sawiin, "India sorkarin zirna a ngaih pawimawh viau rualin, leilungin a zir loh vang leh inkalpawhna ṭha tâwk loh vangin hmun kilkhâwr zawka naupangte'n duhthusamin zirtirna ṭha an dawng thei lo fo a, chu harsatna sukiang tura satellite hmanga zirtirna pek chhuah a ni thei tur hi Mizoram tan hma­sawnna rahbi lian tak a ni," a ti.

H Rohluna chuan, zirlaite'n EDUSAT Network an hlâwkpui ngei theih nan duhsakna a hlan a; zirna piah lamah, sorkar department leh ṭul dang atan leh chhiatrup thlen palhah pawh EDUSAT Network chu a ṭangkai dawn avangin, khawl enkawltute chu ṭha tak leh taima taka enkawl turin a chah a ni.

Mizoram EDUSAT Net­work hawnna inkhawm hi SCERT director Laldawngliani Chawngthu-in a kaihruai a; SCERT-in zirlaite zirna pui thei tur science subject bik atana Educational Software an siam leh ICT Module a bua an siam chu School Education Minister hian a tlangzarh nghal.

Indian Space Research Organisation (ISRO) hnuaia Development & Educational Unit (DECU) director Virender Kumar pawhin thu sawiin, India rama ISRO leh DECU hnathawh leh hmalaknate a sawi a; Mizoramah Satellite Interactive Terminals (SITs) 50 awm tura ruahman a ni a, chu'ng zinga 23 chu bun tawh niin, kumin Krismas hma ngeiin a dang 27 pawh bun vek an tum thu a sawi a, "Kum thara sikul ṭan leh hunah heng SIT-te hmang hian satellite kaltlanga zirna kalpui nghal a ni thei ang," a ti.

Hawnna inkhawm zawhah EDUSAT Hub tur, EDUSAT Studio, SCERT Silver Jubilee building-a mi chu minister H Rohluna’n a hawng a; EDUSAT Hub aṭang hian Reiek H/S leh SIT dangte chu School Education Minister, DECU Director leh SCERT Director ten video conferencing hmangin an bia a ni.

Sorkar laipuiin zirna bika hman tur satellite 'EDUSAT' chu ISRO kaltlangin September 20, 2004-ah Geosynchronous Satellite Launch Vehicle (GSLV-3) hmangin a kâp chhuak a; chu satellite hmanga zirna pek chhuah a nih theih nana khawl hman turte chu ISRO-in India ram state hrang hrangah pe chhawngin, Mizoram tan pawh EDUSAT khawl, cheng nuai 100 chuang man SCERT building-ah bun a ni.

SCERT directorate-a EDUSAT Hub aṭanga zirna pek chhuahte lo dawnsawn theihna tur SIT chu Mizoram district pariata DIET-ah leh IASE bakah, zirna-in thlan chhuah 50-ah dah a ni a; satellite hmangin zirlaite hnenah zirtirna pek chhuah ṭhin a ni ang.

Mizoram EDUSAT Network hawnnaah hian Northeast Space Application Centre (NESAC) scientist pahnih - Anjan Debnath leh SS Kundu Rajshekhar te pawh an tel a ni.