Thanliana'n SGA Assembly a hmanpui

Social Guidance Agency (SGA) chuan nimin khan Sakawrtui­chhuna SGA Centre-ah General Assembly vawi 31-na an hmang a; Social Welfare minister PC Lalthanliana'n a hmanpui.

SGA Assembly hi SGA Board of Director chairman Dr HL Malsawma'n a kaihruai a; minister PC Lalthanliana chuan, sorkar leh kohhran anga ruihhlo ngaite chhanchhuahna ber pakhat chu camping a nih thu a sawi rualin, home leh centre-te chu chhanchhuahna hmunpui leh ṭangkai tak a nih reng thu a sawi a ni.

PC Lalthanliana chuan, khawvel a changkang a, ruihhlo tihte a danglam zel a, thil sual tih dante pawh a dang­lam a, a khirh chho zel tih sawiin, "Kohhranin camping kan neih maite hian min chhan chhuak zo ta lo a, awmze nei zawka ruihhlo ngaite enkawl a ṭul ta. Sorkar­in duhthusamin ti thei lo mah se, kohhran te, tlawmngai pawlte leh mimal inpete'n ruihhlo ngai enkawlna hmun eng emaw zat an siam a, sor­kar hriatpui leh pawmpui pawh 10 lai a awm tawh a ni," a ti a; centre leh home-te tichangtlung turin sorkarin hma a lak mek thu a sawi.

Social Welfare Minister chuan, Mizoramah ruihhlo ngaite enkawl leh ruihhlo do hna chu mimal kuta dah ngawt chi a ni tih a sawi a, "Kan za vaiin kohhran ang te, tlawm­ngai pawl angte leh sorkar angtea kan ṭanrual a ngai a ni," a ti.

Minister PC Lalthanliana hian SGA Centre-a hman atan aurinna (public address system) set khat a pe a; SGA leh a dintu rawngbawlna chanchin Dr C Dozuala ziah a tlangzarh bawk.

SGA Assembly-ah hian SGA hnuaia project hrang hrang - Integreted Rehabilitation Centre for Addict (IRCA), Drop in Centre (DIC), Mobile Medical Unit (MMU) leh Family Councelling Centre (FCC)-te hmalakna leh hmachhawpte report ngaihthlak a ni.