Disaster response vehicle tlangzarh

Lawngtlai district-a chhiatna a thlen thulha chhanchhuah hna thawhnaa hman tur disaster response vehicle leh hmanraw dangte chu nimin khan Lawngtlai DC pisa tualah Disaster Manegement and Rehabilitation (DMR) minister C Ngunlianchunga'n a tlangzarh.

DMR Minister chuan, chhiatna ven kawnga Lawngtlai district-in hmasawnna hmêl thar a hmu chu lawmawm a tih thu a sawi a, kawng tinrengah Lawngtlai district-in hma a sawn zel theih nan sorkar department hrang hrang hotute chu theihtawp chhuah turin a ngen.

Chhiatna thlen thulha hmalak dan tur leh inven dan hriat a pawimawh avangin inzirtirna tam zawk buatsaih a, naupangin an ṭhan hnan theih tura inzirtir reng a

ṭul thu sawiin, Ngunlianchunga chuan, "Sorkar pawhin chhiatna kawnga invenna lam a ngai pawimawh hle a, State Disaster Response Force (SDRF) dinin, an hnuaiah police leh tlawmngai pawl mi eng emaw zat zirtirna pek tawh an ni a, mi tam zawk la zirtir zel tum a ni," a ti.

C Ngunlianchunga chuan, SDRF fund zinga 5% chu hmanrua leh bung­raw lei nan dah a nih thu sawiin, "Sorkar department hrang hrang pawhin an budget aṭangin eng emaw zat chu chhiatna laka invenna atan an dah hrang tur a ni," a ti a; chhiatna vanga in leh lo leh rohlute chân palh theih a nih avangin, insurance tih nachâng hriat a pawimawh thu a sawi bawk.

Disaster response vehicle tlangzarhna inkhawm hi Lawngtlai bawrhsap Dr Arun T-in a kaihruai a; DMR nodal officer Lalrinawma'n Lawngtlai District Disaster Management Authority-in disaster management lama hma lakna thar a neih leh thil thar a tawn te, hmalak zel dan turte a sawifiah bakah, Lawngtlai SP Lalsanglura pawhin thu a sawi a ni.

Disaster response vehicle atan hian Lawngtlai DC office motor hman lai (Gypsy) chei ṭhat a ni a; motor-ah chuan leimin, in chim, kângmei leh tuitla an awma hman tur hmanraw an lei tharte chhawp niin, hman a ṭul huna tlan chhuahpui mai theih tura thuam a ni.

Lawngtlai district-ah hian khuarel chhiat­na thlen theitu thlipui leh ruahpui thleng tur SMS hmanga inhrilh darhna (disaster alert system) ruahman thar a ni a; chhiat­na thlen thulha sorkar thuneitute hriattir vat a nih theih nan a thlawna biak theihna (toll free number) 1077 ruahman a ni bawk.