Sorkar hnathawk mek leh châwl tawh ; Aadhaar card duh lote'n pawl an din

Mizoram sorkar hnathawk châwl tawh leh thawk mek zinga ṭhenkhat, Aadhaar card hmang duh lote chuan November 23, Ningani khan Bawngkawn YMA Hall-ah Mizo Against Bio Metric Enrolment pawl an din.

Mizo Against Bio Metric Enrolment (MABME) hruaitute sawi danin, Mizoram sorkar hnuaia thawk mek leh châwl tawh, Aadhaar card hman duh lote chu a hma pawhin an lo inhmu khawm tawh a, MABME pawl dinin, hruaitu tur pawh an inruat nghal a ni.

Bawngkawn YMA Hall-a an inhmuhkhawmnaa telte chuan Aadhaar card chu Kristian sakhaw inzirtirna nena a inkalh nia an hriat dan an sawi a, Pathian thute an sawi bawk. MABME hruaitute chuan, an pawl kal zel dan tur chu committee-in an la ngaihtuah ṭha dawn a, vawiinah pawh an inhmu khawm leh dawn niin an sawi.

Mizoram sorkar hnuaia thawk mek leh châwl tawh, Aadhaar card hman duh lote hi October 19, 2017 khan an lo inhmu khawm tawh a; sorkar chu bank kaltlang loa sum faia hlawh pe turin September 21, 2017 khan an lo ngen tawh a ni. Aadhaar card chu bank account nena thlun zawm a nih chuan, an bank account chu duh duh huna tihchingpen theih turah an ngai a ni.