Birth & Death registration chungchang sawiho

Inter Departmental Coordination Committee (IDCC) on Civil Registration System (Births & Deaths) chu nimin khan an chairman Dr C Van­lal­ramsanga, Births & Deaths chief registrar leh Planning secretary hoin Planning & Programme Implementation department conference hall-ah an ṭhu a; thil pawimawh hrang hrang an ngaihtuah.

Meeting-ah hian, registration unit thar din chung­chang te, Medical Certificate of Causes of Death (MCCD) kalpui dan leh district tina zirtirna inpek te, Mizorama piang leh thi zat dik leh rintlak taka chhinchhiah a nih theih nana hna thawh dan te, harsatna tawhte leh harsatna sutkian dante sawiho a ni.

Tlai khawhnua birth certificate dilte mahni ngei inlana dilna thehluh tur a nih thu sawi lan niin, tlai khawhnua dilte dilna leh lehkha pawimawhte a dik tawk em tih enfiah zung zung a nih theih nan leh, district hranga inziah luh thuah a awm loh nana digitization a hmalak dan turte an sawiho bawk.

Certificate dik lo siam leh dan loa certificate-a thuziak tidanglam awm ṭhin chungchangah, mi tin mawhphurhna a nih thu sawiin, mawhphurhna neite chu fimkhur turin an chah a; certificate lem siam a awm loh nan tuna hman mek hologram/holistic bakah, QR code dah tel ni se, an ti.

Committee chuan District Research Officer tinte chu fimkhur lehzuala birth certificate pe chhuak turin a ngen a; sorkar hna thawh rei duh vang te, infiamna lama intihsiaknaa tel duh vang leh chhan dang vanga pian kum dik loa birth certificate thar siam tum chungchangah te, India khua leh tui ni loin thil dang atana hman ṭangkai duh vanga birth certificate an dil chung­changah te, fimkhur a, thil dik lo tih tumte chu hnâwl zel turin DRO chu hriattir an ni.

Tun dinhmunah Mizoram pumah registration unit 843 a awm mek a ni.