RIPANS Graduation & Lamp Lighting

Regional Institute of Paramedical and Nursing Sciences (RIPANS) chuan nimin khan zirlai chhuakte thlahna, Graduation Day leh zirlai lut tharte lawmna leh thu tiamtirna Lamp Lighting Ceremony an hmang a; minister Zodintluanga'n a hmanpui.

Zodintluanga chuan, RIPANS chu India hmarchhak state-te tan a ṭangkai thu leh Mizorama awm a nih angin Mizote tan a ṭanglai lehzual thu a sawi a, "Tunlai khawvel changkang zelah inelna a san zel avangin intuai­hriam a ṭul a, chutiang inbuatsaihna atan chuan RIPANS hi a pawimawh hle a ni," a ti.

RIPANS zirlai leh zir zoa chhuak turte fuih­in Zodintluanga chuan, "Damlo enkawlnaah dawhtheihna, hawihhâwmna, ṭawngkam ṭha leh hmangaihna nena in enkawl chuan mipui rilru mangang pawh in thawi dam thei ang," a ti a; RIPANS aṭanga zir chhuakte chu India hmarchhak mai ni loin, India ram hmun hrang hrangah fak an hlawh ṭhin thu a sawi.

Inkhawmah hian RIPANS director Dr Chawngthanliana chuan inlawmna thu a sawi a, B.Sc (Nursing) zir thar tur mi 36-te thu tiamtirna (lamp lighting) chu Asian Institute of Nursing Education principal Dr Unmona Borgohain Saikia kaihhruaiin neih a ni.

Kumin hian RIPANS aṭangin Bachelor of Nursing, Bachelor of Pharmacy, Bachelor of Science in Medical Laboratory Technology, Bachelor in Optometry, Bachelor of Science in Radio Imaging Technology leh, Master of Pharmacy-ah zir chhuak mi 161 an awm a; chu'ng zinga a ti ṭha zualte hnenah minister Zodintluanga'n Proficiency Award a sem a ni.

RIPANS hi kum 1996-ah North Eastern Council-in India hmar­chhak mite tan paramedical leh health sciences zirna atan a din a, April 2007 aṭang­in sorkar laipuia Ministry of Health & Family Welfare hnuaiah an awm. Tunah hian course hrang hrang - B.Sc (Nursing), B.Sc Medical Laboratory Technology, Bachelor of Pharmacy, B.Sc. Radio Imaging Technology, Bachelor in Optometry a awm a; kum 2014 aṭangin Master of Pharmacy zirna hawn a ni bawk.

RINPANS-ah hian India hmarchhak state tinin quota an nei a, tunah hian zirlai 682 an awm mek a ni.