KHAWTHLIR

Penalty holiday
Transport department chuan lirthei chhiah (fee) leh driving license kaihhnawih thil hrang hrangah a hun taka tih tur ti lote tan ngaihhnathiamna hun (penalty holiday) a hawng mek. Penalty holiday hi February 12, 2018 thleng hawn a ni a; hemi chhung hian license thi tawh tihnun te, late fee chawi loa road tax pek te, fee dang chawi ngaite pawh late fee tel loin pek theih a ni ang.

Constitution Day
November 26, Pathianni hi India danpui duang chhuaktu, Dr BR Ambedkar pian champha vawi 125-na a ni a, he ni pual hian kum 2015 aṭangin 'Constitution Day' hman ṭhin niin, India danpuia 'Preamble' chhiar chhuah ṭhin a ni. Constitution Day hi kuminah chuan Pathianni a nih avangin Mizoram sorkar chuan November 27, Thawhṭanniah an hmang dawn a, chawhma dar 11:00-ah Preamble chhiar chhuahna hun hman a ni ang.

MZP H/S Quiz
MZP chuan kum tin an tih ṭhin, Inter High School Quiz 2017 chu an buatsaih leh dawn a, nimin khan MZP Pisapui conference hall-ah a khuhhawnna hun an hmang. MZP Inter High School Quiz hi kum 2010 aṭangin kum tin buatsaih a ni a; November 27 zan aṭangin Ignite Studio, Khatlaah ṭan tur niin, ZONET Cable Television-ah live-a tihchhuah a ni ang.

Suakliana Lungphun
Historical Sites and Monument Preservation Committee, Lianpui bultumin November 23, Ningani pathian hla eng emaw zat phuahtu Suakliana (1901-1979) chawimawina lung an phun. Chawimawina lungphun hi Suakliana'n lu a nghahna, Suakliana Thlantlang, Lianpuiah phun a ni a, East Tuipui bialtu MLA T Sang­kunga'n a hawng a ni.

SSA & RMSA
Mizoram SSA & RMSA thuneitu sang, 39th. State Executive Committee chu nimin khan chairman Lalmalsawma, chief secretary hoin CS Conference Hall-ah an ṭhukhawm a; Annual Report & Audited Statement of Accounts under SSA & RMSA for the Financial Year 2016-17 an pawm.