Tourism minister Reddy-a'n ITM a hawng

19th November, 2022

Sorkar laipuia Tourism minister G Kishan Reddy chuan November 17, Ningani zan khan R Dengṭhuama Hall-ah International Tourism Mart 2022 (ITM 2022) a hawng.

Union Minister hian chief minister Zoramthanga nen R Dengṭhuama Hall aṭangin Chite Venga Aizawl Convention Centre sakna tur te, PRASHAD project bul ṭanna tur te, PM-DevINE hnuaia bamboo link road pahnih - Tuirial Airfield - North Chaltlang leh Lengpui - Saiphal hna thawh bul ṭanna turte lungphùm an phúm a; Kishan Reddy hian Mizoram Tourism Coffee Table Book a tlangzarh bawk.

G Kishan Reddy chuan, Mizoram chu ram nuam leh mawi, adventure leh eco-tourism lama hma lam hun êng tak nei a nih thu a sawi a; ITM-in a tum ber chu, India hmarchhak biala tourism tihhmasawn a nih thu sawiin, "ITM kaltlangin khualzin hîp thei hmun hrang hrangte leh hmarchhak state thil siam leh tharte pho lan a, sorkar, mimal leh páwl hrang hrangte'n a hlâwkna an tèl theihna tur kawng zawnna atan inkawmhona leh sawihona hun ṭha siam a ni," a ti.

G-20 (Group of 20)-a president nihna India-in a chelh mek chuan khawvel huapah India chu dinhmun sang takah a dah dawn tih sawiin Kishan Reddy chuan, "Hmarchhak state-a tourism investment hawnna atan nasa takin a pui dawn a ni," a ti a, investment-te chu mihring indawnsawnna (hospitality) huangah chauh ni loin adventure, cruise, wellness leh a dangteah pawh nasa taka tihpun a nih tur thu a sawi.

Tourism Minister chuan, SWADESHI DARSHAN leh PRASHAD scheme-te ngaih pawimawh bik an nih tur thu sawiin, "Prime minister Narendra Modi-a'n ram chhunga khualzin hîp thei hmunhma 15 tal kum 2022 ral hmaa tlawh turin mipui a ngen a, chhungkuaa naupangte'n thâ an thawh theih nan Mizorama college leh sikulahte Yuva Tourism Club din a ni," a ti.

ITM 2022 hawnnaah hian chief minister Zoramthanga leh Tourism minister Robert Romawia Royte pawhin thu an sawi a; Union Tourism secretary Arvin Singh, Mizoram chief secretary Dr Renu Sharma leh Tourism secretary Manisha Saxena te pawh an tel. Hawnna inkhawm zawhah hall tualah cultural programme hman a ni.