CADS batch hnihna lak luh a ni

Central YMA hnuaia ruihhlo dotu, Central Anti Drugs Squad (CADS) batch hnihnaa tel turte chu nimin khan CYMA Hall-ah lak luh a ni.

CADS member tur hian Aizawl khawpuia YMA branch aṭangin member ruat a ni a; batch khatnaah khan member 54 awmin, batch hnihnaah hian member 48 an awm ang. Thla hnih (November & December) chhûng atan ruat an ni.

CYMA president R Lalngheta chuan, CADS member tharte lawm luhna hun a hmang a, thu sawiin, "Pathian rawngbâwltute din YMA hi Pathianin a ṭanpui báng lo. Kan ram leh hnam tana ke a pênna kawng hrang hrangah Pathian hian a la ṭanpui zel dawn a ni," a ti a; theihtawp chhuaha ram leh hnam damna atana huai taka kal turin CADS member tharte a chah.

CADS member thar lak luhna inkhawm hi CYMA vice president Lalhmachhuana'n a kaihruai a, CADS convener tur Fabian Lalfakawma, CYMA treasurer pawhin thu a sawi.