Home Minister-in Mizo 3rd IR-te a tlawh

Home minister Lal­chamliana chuan nimin zing khan Assam state chhung, Mangaldai khuaa Mizo 3rd Indian Reserved Police-te a tlawh a, Sammelan a hmanpui bakah, an hmunhmate a fang kual.

Lalchamliana chuan, Mizo 3rd IR police, Assam-a awmte'n an chheh­­vela chêng mipui leh vantlang nen inlaichìnna ṭha an nei zel chu lawm­awm a tih thu sawiin, "Force mite hi an bul hnaia awm mipui nen thawhhona leh inlaichìnna ṭha neih hi an tihmâkmawh a ni," a ti a; an kalna apiangah Mizoram tihmingṭha thei leh tihmingchhe thei an ni tih inhre renga an duty hlen turin a fuih.

Home Minister chuan, Mizoram páwna kum 12 chuang an awm tawh chhungin hel leh misual kuta thi leh hliam an la awm lo chu Pathian hruaina a nih thu a sawi a; hotute thu awih a, thil ṭha lo, taksa tichhe thei leh ngaihtuahna tibuai theite ti lo tur leh insûm turin a fuih. Kohhran thilpek leh rawngbawlna lama an luan chhuahnate chu ṭha a tih thu sawiin, chhawm nung zel turin a chah bawk.

Sammelan hi DIG (Armed) Dinesh Kumar-a'n a kaihruai a, 3rd IR commadant B Laldikpuia'n 3rd IR battalion chanchin a sawi. Home Minister hian Krismas hmanna leh ṭul dang atan Rs 70,000 a hlân a ni.

Home Minister hian Mangal­dai-a 3rd IR hmunpui a tlawh bakah, duty post pahnih - Nagrijuli leh Tamulpur-a mite a tlawh a; Mizo police duty mekte chu an awmna apiangah Mizoram leh Mizote hmél timawitu ni zel turin a chah.

Mizo 3rd IR hi kum 2007-ah din a ni a, kum 2010 aṭangin Mangaldai, Assam-ah an awm ṭan a; mi 275 vel awm mekin, chu'ng zing mi 40 vel chu chhungkuain an khawsa a ni.

3rd IR police-te hi Chhattisgarh-a Naxal hel awmna hmunah pawh ṭum eng emaw zat tirh an ni tawh a, India ram hmun hrang hranga inthlanah venhimna hna thawkin an che chhuak tawh bawk. Assam-a district panga - Golaghat, Tamulpur, Hojai, Nagaon leh Darrang-ahte hmun 19-ah duty post an nei mek a ni.