2019 hnuah sikul zirtirtu nghet 152 leh nghet lo mi 880 lâk a ni tawh

Samlukhai Middle School chuan nimin khan an sikul kum 50-na, golden jubilee an lawm a; khuallian, Human Resource Development board vice chairman L Thangmawia, MLA chuan, kum 2019 hnuah sikula zirtirtu a ngheta thawk tur mi 152 leh a nghet loa thawk tur mi 880 lak a nih tawh thu a sawi.

L Thangmawia chuan, hripui léng karah Mizoram sorkarin zirnaah nasa takin ṭan a la nia sawiin, "School Education minister Pu Lalchhandama Ralte kaihhruaina hnuaiah zirna siamṭha turin theihtawp chhuah a ni a, December 2018 thlaa sorkar thar a pian hnu khan zirtirtu 958 an châwl tawh a, chutih rualin, MPSC kaltlangin zirtirtu nghet 152 lak tawh niin, MR zirtirtu 880 lak a ni tawh bawk," a ti.

L Thangmawia chuan, headmaster-a kai sang zirtirtu 548 an awm thu leh SEDP hnuaiah kum khat chhung atan zirtirtu 771 lak a nih tawh thu a sawi bawk.