ICFAI University-in convocation hmang 'Mizoramah eizawnna nena inkaihhnawih thil a hranpaa zirna a tam lo' - Governor

ICFAI University, Mizoram chuan nimin khan an auditorium-ah Convocation vawi 10-na an hmang a, Governor Dr Hari Babu Kambhampati-a'n a hmanpui. Larsap chuan, "Mizorama zirna kalpui mekah hian eizawnna nena inkaihhnawih thil a hranpaa zirna a tam lo," a ti.

Convocation hi ICFAI University vice chancellor Prof. RP Vadhera-a'n a kaihruai a; chancellor Prof. YR Haragopal Reddy-a'n a hawng. Zirlai hlawhtlingte'n thutiam an lak hnuah Chancellor hnen aṭangin an degree neih nemnghehna an dawng a; zirlai ti ṭha zual mi 14 hnenah gold medal leh mi 13 hnenah silver medal hlan a ni.

Dr Hari Babu Kambhampati chuan, zirlai degree nei tharte chu a lawmpui thu sawiin, "Mizorama zirna kan kalpui mekah hian eizawnna nena inkaihhnawih thil a hranpaa zirtirna a tam lo hle a, Arts subject leh subject tluangtlam lam zirna ṭha thawkhat mah se, hmasawnna kawng zawh tur leh chhawr tlak mithiam chher chhuak tur chuan duhthu a sâm tâwk lo," a ti.

Zirlaite'n a tam thei ang ber vocational education leh skill development lam an zir a ṭul thu sawiin Governor chuan, "Hna zawng tura zirtirna pek lam aiin, mi dangte chhawr theih tura mithiam, mahni kutkea bul ṭan thei leh an hlawhtlin tak tak hma aṭanga mi dang tana hnathawh tur siam thei mi tam zawk chher chhuah kan tum tur a ni," a ti a; sorkar laipui scheme-te a dawng tur dik takte'n an dawn theih nan a puanzar lamah ṭan lak a ṭul thu a sawi bawk.

ICFAI University, Mizoramah hian general leh professional line zir theih chi hrang hrang a awm a, zirlai 618 an awm mek. Kuminah zirlai 98 an inzir chhuak a, post graduate 75 leh under graduate 23 an ni.