Tourism minister GK Reddy leh CM inkâwm

Union Tourism minister G Kishan Reddy leh chief minister Zoramthanga chu nimin zing khan Raj Bhavan-ah an inkâwm a, thil chi hrang hrang an sawi dun.

Inkawmnaah hian India ram hmasawnna kawnga hmarchhak state te, a bik takin ṭhenawm ramte nena ramri inṭâwmte an pawimawh thu te, Act East Policy hlawhtlin theih dan tur an sawi dun a; CM Zoramthanga chuan, ṭhenawm ramte'n remna leh muanna an neih chu India tan a pawimawh thu leh remna an neih theih nan India-in thâ a thawh ve a pawimawh thu a sawi.

G Kishan Reddy chuan, International Tourism Mart hlawhtling taka Mizoramin a thleng chu lawmawm a tih thu a sawi a; Mizoram leh India hmarchhak bialah nasa zawka tourism industry a ṭhan zel a, economy-in hma a sawn phah ngei a duhsak thu Zoramthanga a hrilh.

G Kishan Reddy hian nimin khan Mizoram chhuahsanin New Delhi a pan a ni.