Puithiam awm ngheh kum 75-na lawm

Mizorama Roman Catholic kohhran chuan puithiam awm ngheh kum 75-na an lawm mek a, nimin khan St. Lawrence Church, Ramthar Veng, Aizawlah mass leh seminar buatsaih niin, Catholic kohhran hotu Cardinal Oswald Gracias-a'n a hmanpui.

Mizoramah Catholic kohhran din a nih hnuah puithiam hna thawk turin kum 1947 khan Father George Breen leh Brother Gilbert Boucher te Aizawlah an rawn thleng a, Kulikawn an awm a ni. Kumin hi pui­thiam awm ngheh kum 75-na a ni a, Catholic kohhran chuan an lawm mek a ni.

Mizorama Catholic kohhrana puithiam awm ngheh kum 75-na lawmna atan vawiin hian St. Lawrence Church-ah vêk tihdam rawngbawlna neih a ni dawn a, zaninah Vanapa Hall-ah lawm chhunzawm a ni ang. Naktuk Pathianniah jubilee lawmna pui ber neih a ni dawn a, chawhma dar 10:30-ah Christ the King Cathedral-ah inkhawm neih a ni ang a, chawhnuah Upper Khatla aṭanga Christ the King Cathedral thleng kawngzawh a ni ang.