Mi sawichhiat chíngte mipuiin ram hruaitu atan an duh lo - MNF Treasurer

MNF treasurer K Vanlalauva chuan nimin khan Mizo Hnam Rúna inkhawmah thu sawiin, Mizoram politics-ah hruaitu insawichhiat tawn an chíng chu ṭha lo a tih thu leh mi sawichhiat chíngte chu mipuiin ram hruaitu atan an duh loh thu a sawi.

K Vanlalauva chuan, "Tute emaw sawichhe kher loa politics sawi thiam lote hi mipuiin rorel tlâkah an ngai thei lo, thu dik leh dik lo chawh pawlha thu sawi chíngte avangin kohhran ram thlengin a nghawng ṭhin. Hruaitu insawichhiat tawn kan chíng hi a ṭha lo hle a, politics-a inchirhthehna leh mimal nun inlipsêsakte hian rah ṭha a chhuah ngai lo," a ti.

Sual bik leh ṭha duh hauh lo an awm bik lo nia sawiin Vanlalauva chuan, "Mi ṭha nia kan ngaihte hi sorkara an awm hnu hian an sual thar thut i ring lo ang u. Sorkar hian kalphung a nei a, dan avanga thil tih mai rem lo a awm ṭhin. Mipui rilru mumal pu hlei thei loa siamtute hi anmahni thoin a tuar leh ṭhin," a ti a; inpuhchhiatna leh thu dik lo sawiinm kohhran ram a nghawng ṭhin a, chu chuan political leader-te bawk a vaw lêt ṭhin niin a sawi.

MNF Treasurer chuan, rorel tura political party tinte'n hma an laknaah, ro kan rèl huna ram kaihhruai dan tur sawi mai se a duh thu sawiin, "Insawichhiat vak mai hi mipui hîpna a ni lo. Eng mah la ni ve lote'n hre ber leh thiam ber emaw an inti hi an hriat lohzia pawh an inhre lo a ni," a ti bawk.