BJP chungchang dik loa sawi an awm ṭhin - BJP President

BJP, Mizoram Pradesh president Vanlalhmuaka chuan, BJP chungchang dik lo taka sawi an awm ṭhin niin a sawi a, Mizoram sorkarin central aṭanga hmasawnna tur rawn kalte chu thawk zo loin, a tam zawk chu sorkar hotute ipteah a lut niin a sawi bawk.

Vanlalhmuaka hian nimin khan an party pisaa inkhawmah thu sawiin, thil enfiah hmasak loh vanga buai phah mi tam tak an awm niin a sawi a, "BJP chungchang pawh dik lo taka sawi an awm ṭhin a, awih nghal mai chi kan lo awm mai zel hian Mizoram mipui rilru ngheh lohzia a tilang a, an thusawi a dik leh dik loh fiah tura thu dik zawn pawh kan tum ngai lo," a ti.

BJP President chuan, Mizo mipui tam takin Krismas ní, December 25 chu Good Governance Day atana hman a nih avangin Kristiante tan hlauhawm viau anga sawi an awm ṭhin nia sawiin, "He mi ní hi AB Vajpayee birthday a nih avangin, amah hriat rengna atana hman mai zawk a ni a, Kristian state-ah chuan ni 25-ah kher hman a ngaih loh thu hrilh kan ni," a ti a; Good Governance Day ní aiin, a tum a pawimawh zawk thu a sawi.

Retheihna aṭanga India ram chhuah zalen chu prime minister Modi-a tum ber a nih thu sawiin Vanlalhmuaka chuan, "Tunah pawh chumi tihlawhtling turin nasa taka hmalak a ni a, India mi tu pawhin an chanvo an chan theih vekna turin hmalak mek a ni a, PM scheme hrang hrang hmangin India mi, retheihna sala táng mekte chhanchhuah hi kan hnapui ber a ni zawk," a ti.