Aizawl Theological College-in College Day an lawm

Aizawl Theological College (ATC) chuan nimin khan an college-ah ATC Day vawi 57-na an lawm a, zirlai ti ṭhate hnenah lawmman hlan a ni.

ATC Day hi Synod moderator Rev. Dr Vanlalnghaka Ralte-in a kaihruai a, ATC principal Rev. Prof Tlanghmingthanga'n kum khat kal taa ATC rawngbawlna hrang hrang a sawi a, speaker atana ruat Rev. Dr Lalchungnunga'n thupui 'Integrity: The Essential Quality' tih a sawi.

Mizoram Synod senior executive secretary Rev. C Zorammawia leh Synod secretary Rev. ZD Lalhmachhuana ten zirlai ti ṭhate lawmman an hlàn a; ATC faculty-in literary project an neih zinga lehkhabu pahnihna, 'Mizo Christianity' tih chu Rev. C Zorammawia'n a tlangzarh bawk a, Mizo Kristianna ziaráng leh kalphung kawng hrang hranga thlirna lehkhabu a ni.

ATC-ah hian zirtirtu thawk nghet 27 leh a nghet loa thawk panga an awm mek a, BD zirlai 112, M.Th. zirlai 59, D.Th. zirlai 18 leh DCPC zirlai panga an awm a, zirlai awm mek zat chu mi 194 an ni.