Zoram Harh Rawh Campaign hnuaia Intihsiakah YMA branch 4 chiah an tel

Champhai District Organising Committee on Zoram Harh Rawh Campaign chuan HIV/AIDS dona atana hmalakna, 'Zoram Harh Rawh Campaign' hnuaiah nimin khan Champhaiah YMA branch-te tan Kahrawt community hall leh field-ah Mizo hnam làm leh zai hmanga intihsiak an buatsaih a; YMA branch pali chiah an tel.

'Zoram Harh Rawh Campaign' hi Central YMA leh Mizoram State AIDS Control Society (MSACS)-te thawh dunnaa buatsaih a ni a, YMA awmna district tinah buatsaih tura tih niin, district tina ti ṭhate chu Mizoram pum huap intihsiaknaah an district aiawhin an tel dawn a ni.

Intihsiak inkhawm hi YMA Sub-Hqrs, Champhai president F Lalrinmuana'n a kaihruai a, bawrhsap James Lalrinchhana khuallian a ni. Intihsiakah YMA branch pali - Kahrawt, Venglai, Zotlang leh Kanan branch-te chiah an tel.

Khuallam leh Cheraw (Kântluang) leh pipu zai hmangin intihsiak a ni a; a pumpuiah Kahrawt Branch pakhatna niin, lawmman Rs 50,000 an dawng a, Mizoram pum intihsiakah Champhai district aiawhin an tel ang.

Pahnihna Kanan Branch-in Rs 30,000 leh pathumna Venglai Branch-in Rs 10,000 an dawng a, palina Zotlang Branch-in Rs 5,000 an dawng bawk.