Pneumonia do chungchang sawiho

National Health Mission chuan nimin khan Multidisciplinary Training Centre-ah pneumonia vanga naupang kum nga hnuai lama thihna thleng ṭhin donaa beihpui thlakna, 'Social Awareness and Action to Neutralize Pneumonia Successfully (SAANS) Campaign' an buatsaih a, Health Services director Dr Lalzepuii'n a hmanpui.

Inkhawm kaihruaitu NHM mission director Dr Eric Zomawia chuan, Mizorama naupang kum nga hnuai lam thihna zinga 10% chu pneumonia vang a nih thu a sawi a; Health Services director Dr Lalzepuii chuan, pneumonia laka inven a pawimawh thu leh pneumonia veite enkawlna hmanrau tihchangtlun a pawimawh thute a sawi.

Dr Lalzepuii chuan, pneumonia veite chu a hun taka enkawl a nih chuan thihna pumpelh theih a nih thu a sawi a, "Naute thla ruk a tlin hmaa nu hnute chauh pek leh chumi hnu lama chaw ṭha dang pek te, hri danna lak ṭhat te, an dam loha mithiamte ràwn vat nachang hriat te, fai taka kut sil te, tui thianghlim in te, faina uar leh eirawngbawl nan khu siam thei hman uar lohte hi kan hmalakna tur pawimawh a ni," a ti.