KHAWTHLIR

Kawlphetha pe thei dawn lo
Power & Electricity department chuan vawiin chawhma dar 10 leh chawhnu dar 3 inkarah hna an thawh dawn avangin Zuangtui Sub-Station aṭangin kawlphetha an pe chhuak thei dawn lo. Hei vang hian Ramhlun veng aṭanga hmar lam, Sihphir leh Tuirial Airfield inkara khua/vengte'n kawlphetha an hmu thei dawn lo. PE department chuan mipui hriatthiamna an ngen a ni.

Jubilee lawm
Assembly deputy speaker Lalrinawma chuan nimin khan Nursery Veng Model English Medium School kum 60 tlin lawmna a hmanpui a, diamond jubillee lungphun a hawng. Jubilee lawmnaah hian School Education joint director Zohmingthanga, Nursery Veng LC, YMA, MHIP, Nursery Veng Presbyterian Commitee aiawhte bakah, headmaster Rinhmingliani Ralte ten thu an sawi a ni.

VC House hawng
Vairengte VC-II House sak thar chu nimin khan bialtu MLA Lalrinsanga Ralte-in a hawng. Lalrinsanga chuan, Mizoram luhka pawimawh Vairengte chu sorkarin tihhmasawn tumin theihtawp a chhuah thu sawiin, Vairengtea sorkar hmalakna hrang hrangte a tarlang. VC House hi Rs 34,08,620 senga sak a ni.

Lunglei HS Games
Lunglei District Secondary School Sports 2022 chu nimin khan Lêna Stadium-ah khâr a ni a, MLA Dr K Pachhunga'n a hmanpui. Sports hi November 15-18 chhungin neih a ni a, sikul 16 telin, football, volleyball, table tennis, badminton leh athletics-ahte an inel a; Bazar High School pakhatna an ni. Henry Lalmalsawma, Vanhe H/S best boy a ni a, Ramnunpuii, Pukpui H/S best girl a ni.

Lunglawn khaw kum 125-na lawm
Lunglawn, Lunglei chuan nimin khan an khaw kum 125 tlinna an lawm a, minister C Lalrinsanga leh bialtu MLA Dr K Pachhunga ten an hmanpui. Kum 125-na lawmna hi November 15, 2022 khan an ṭan a, nizan khan Lunglawn Field-ah concert neiin an khâr a ni.