KHAWTHLIR

Sorkar hnathawkte Chhuah phalsak
GAD secretary K Lalthawmmawia chuan nimin khan hriattirna ti chhuakin, Aizawla International Tourism Mart neih mek chu a hlawhtlin zual theihna atan leh tlawhtu an tam theihna atan Lammuala stall hrang hrang hawnte chu Mizoram sorkar hnathawkte tan an hotute hnena phalna lain office hun chhungin November 17-19, 2022 ah tlawh theih a nih thu a tarlang. Lammuala stall-te hi chawhma dar 11 aṭanga zan dar 9 thleng hawn a ni.

Larsapin kawm
Governor Hari Babu Kambhampati chuan November 16, Nilaini zan khan Raj Bhavan-ah Students' Experience in Inter-State Living (SEIL) puala Karnataka, Jharkhand, Delhi, Kerala leh Odisha aṭanga lo kal zirlaite a kawm a, zanriah a buatsaih sak nghal. Heng zirlaite hi Aizawl, Lunglei, Kolasib, Lawngtlai leh Mamit district-a Mizote khawsak dan zir tura lo kal an ni.

Sangha khawi zirtir
Siaha District Fisheries Development Office chuan nimin khan MADC Forest hall-ah sangha khawitute tan 'One Day Conference Cum Workshop on Fish Farming' an buastaih a, MADC dy. chief executive member Lalmalsawma Zasai in a hmanpui.

Halpuah khap
Kolasib district magistrate John LT Sanga chuan ruihhlo leh a kaihhnawih bakah, Krismas leh kumthar vuakvetah silai lem a mu kapchhuak thei, halpuah leh halmawi hrang hrang Kolasib district-ah lakluh, zawrh leh hman khapna thupek a tichhuak. Thupek hi ni 60 chhung hman tur niin, dan zawm lote chu IPC Section 188 hmangin hrem an ni ang.

Scheme hrilhfiah
Champhai District Skill Committee (DSC) leh LESDE department chuan November 16, Nilaini khan IPR conference hall-ah Prime Minister National Apprenticeship Mela (PMNAM) kaltlangin Apprenticeship leh National Apprenticeship Promotion Scheme (NAPS) chungchang inhrilhfiahna an buatsaih a; DSC member te, Champhai Grape Growers Society, H&C Design Group, Social Justice Development India, Kobod Incorporation Private Ltd. hotute an tel.